شىعىس قازاقستانداعى شاحتادا قازا بولعان كەنشىلەردىڭ اتى-ءجونى جاريالاندى، دەپ حابارلايدى “ادىرنا” ۇلتتىق پورتالى.
قر ەڭبەك جانە حالىقتى الەۋمەتتىك قورعاۋ مينيسترلىگى گازدان ۋلانىپ، كوز جۇمعان 4 كەنشىنىڭ دەرەكتەرىن جاريالادى. سونداي-اق جازاتايىم وقيعانى تەكسەرۋ ءۇشىن ارنايى كوميسسيا قۇرىلدى.
«كوميسسيانى شىعىس قازاقستان وبلىسىنىڭ باس مەملەكەتتىك ەڭبەك ينسپەكتورى باتىربەك قيزاتوۆ باسقارادى، ونىڭ قۇرامىنا قر تجم ونەركاسىپتىك قاۋىپسىزدىك كوميتەتى مەن قر دسم سانيتارلىق-ەپيدەميولوگيالىق باقىلاۋ كوميتەتىنىڭ اۋماقتىق دەپارتامەنتتەرىنىڭ، جۇمىس بەرۋشىلەر مەن جۇمىسكەرلەردىڭ وكىلدەرى كىردى. ەڭبەكمينىنىڭ ۇجىمى قازا تاپقانداردىڭ تۋىستارى مەن جاقىندارىنا قايعىرىپ كوڭىل ايتادى»، - دەلىنگەن حابارلامادا.
جازاتايىم وقيعا وسى جىلدىڭ 31 تامىزىندا بولعان. «ەرتىس» شاحتاسىندا اۋىسىم كەزىندە بەلگىسىز زاتپەن ۋلانۋ بەلگىلەرى بار 4 جۇمىسكەردىڭ دەنەسى تابىلدى.
«ۆوستوكتسۆەتمەت» جشس ەكى قىزمەتكەرى:
- ۇڭعىماشى ا. ب. باقىتوۆ، 1984 ج. ت.;
- ۇڭعىماشى ا. ب. كەڭەسباەۆ، 1989 ج. ت.
«شاحتستروي ينجينيرينگ» جشس مەردىگەر ۇيىمىنىڭ ەكى قىزمەتكەرى:
- ۇڭعىماشى ا. ت. جايرعازين، 1978 ج. ت.;
- ۇڭعىماشى ا. ك. قۇسايىنوۆ، 1983 ج. ت.
«ۆوستوكتسۆەتمەت» جشس-ءنىڭ تاعى ءبىر جۇمىسكەرى، ۇڭعىماشى ا.ك. قامباروۆ اۋرۋحاناعا جاتقىزىلدى.
