اباي وبلىسىندا 19 قىركۇيەكتە ورلوۆ شاحتاسىندا تاۋ ماسساسى قۇلاپ، ءبىر جۇمىسشى قايتىس بولدى، تاعى بىرەۋى زارداپ شەكتى. بۇل تۋرالى KAZ Minerals توبى ءمالىم ەتتى، دەپ حابارلايدى “ادىرنا” ۇلتتىق پورتالى.
«2024 جىلدىڭ 19 قىركۇيەگىندە ساعات 14:20 شاماسىندا كاسىپورىننىڭ ەكى قىزمەتكەرى جاراقات الدى. الدىن الا سەبەپ — تاۋ ماسساسىنىڭ قۇلاۋى. العان جاراقاتتارىنان زارداپ شەككەندەردىڭ ءبىرى اۋرۋحانادا قايتىس بولدى. مەديتسينالىق كومەك كورسەتىلگەننەن كەيىن ەكىنشىسى ۇيىنە جىبەرىلدى»، - دەلىنگەن حابارلامادا.
وقيعانىڭ ءمان-جايى مەن سەبەپتەرى انىقتالۋدا، قايعىلى وقيعانى تەرگەۋ جونىندەگى ارنايى كوميسسيا قۇرىلدى.
«Kaz Minerals توبى ديرەكتورلار كەڭەسىنىڭ توراعاسى ولەگ نوۆاچۋك جازاتايىم وقيعانى تەرگەۋگە جەكە قاتىسۋ ءۇشىن ورلوۆ شاحتاسىنا باردى. KAZ Minerals توبىنىڭ باسشىلىعى مەن ۇجىمى مارقۇمنىڭ تۋىستارى مەن جاقىندارىنا كوڭىل ايتادى. كومپانيا مارقۇمنىڭ وتباسىنا جان-جاقتى كومەك كورسەتەدى»، - دەپ قورىتىندىلادى كومپانيا.
