شىعىس قازاقستان وبلىسىنداعى بارلىق 11 اۋدان بۇرىنعى ۋاقىت بەلدەۋىنە تولىقتاي كوشتى، دەپ حابارلايدى "ادىرنا" ۇلتتىق پورتالى.
13 ناۋرىزدان باستاپ شەمونايحا جانە گلۋبوكوۆسكي اۋداندارىندا مەملەكەتتىك مەكەمەلەر، كاسىپورىندار مەن الەۋمەتتىك سالا قىزمەتكەرلەرى جاڭا جۇمىس كەستەسىنە اۋىستى. ەندى ولاردىڭ جۇمىس كۇنى 08:00-دە باستالىپ، 17:30-دا اياقتالادى، ال تۇسكى ءۇزىلىس 12:00-13:30 ارالىعىندا بولادى.
شەمونايحا اۋدانى اكىمدىگى جاڭا جۇمىس ۋاقىتىن ەنگىزۋ پروتسەستەردى وڭتايلاندىرۋعا كومەكتەسەتىنىن مالىمدەدى. وزگەرىس ءوڭىردىڭ تابيعي ەرەكشەلىكتەرىنە بايلانىستى قابىلدانعان – بۇل ايماقتا كۇن ەرتە شىعىپ، ەرتە باتادى.
گلۋبوكوۆسكي اۋدانىندا جەرگىلىكتى تۇرعىندارمەن كەزدەسۋ وتكىزىلىپ، جاڭا كەستەنىڭ تيىمدىلىگى تالقىلانعان. اۋدان اكىمى ەلدار تۇماشينوۆ بۇل وزگەرىستىڭ تۇرعىنداردىڭ ءومىرى مەن ەڭبەك جاعدايىن جاقسارتۋعا كومەكتەسەتىنىن اتاپ ءوتتى.
ەسكە سالايىق، 2023 جىلعى 19 قاراشادا ۇكىمەت قازاقستاندا بىرىڭعاي ۋاقىت بەلدەۋىن ەنگىزۋ تۋرالى شەشىمدى ماقۇلدادى.
عىلىم جانە جوعارى ءبىلىم ءمينيسترى ساياسات نۇربەك ۋاقىت بەلدەۋىنىڭ وزگەرۋىنىڭ قازاقستاندىقتارعا اسەرى زەرتتەلەتىنىن ايتتى. بۇل ماقساتقا 100 ملن تەڭگە بولىنبەك. الايدا زەرتتەۋ ناتيجەسىنە قاراماستان، ۋاقىت بەلدەۋىن وزگەرتۋ تۋرالى شەشىم وزگەرمەيتىنى بەلگىلى بولدى.
22 قاراشادا eGov mobile قوسىمشاسىندا ۋاقىت بەلدەۋىنە قاتىستى ساۋالناما جۇرگىزىلدى. 200 مىڭ ادام جاۋاپ بەرگەن سوڭ، ساۋالناما اياقتالدى.
ايتا كەتەيىك، بۇعان دەيىن شىعىس قازاقستان وبلىسىنىڭ 4 اۋدانى "بۇرىنعى ۋاقىت بەلدەۋىنە" كوشكەن ەدى. ەندى بۇل وزگەرىس بۇكىل وبلىس اۋماعىندا جۇزەگە استى.
