2021 جىلدىڭ تامىزىندا اۋعانستاننان اكەتىلگەن اسكەري ۇشاقتار مەن تىكۇشاقتار وزبەكستاندا قالاتىن بولدى، دەپ حابارلايدى “ادىرنا” ۇلتتىق پورتالى.
فەرعانا اگەنتتىگىنىڭ دەرەگىنشە، اقش-تىڭ وزبەكستانداعى ەلشىسى دجوناتان حەنيك ۇشاقتاردىڭ اۋعان حالقىنا ەمەس، امەريكاعا تيەسىلى ەكەنىن ايتقان.
«ۇشاقتار وزبەكستاندا بولادى. بۇل جابدىق ەشقاشان اۋعاندىق بولماعان، امەريكاعا تيەسىلى. اۋعانستان ارمياسى ۇشاقتى پايدالاندى، بىراق ءبىز ۇشاقتارعا ارقاشان قوجايىن بولدىق»، - دەپ ءتۇسىندىردى اقش ەلشىسى.
2021 جىلدىڭ تامىز ايىندا «تاليبان* راديكالدى قوزعالىسى كەزىندە اۋعان ۇشقىشتارى ارىپتەستەرىمەن جانە ولاردىڭ وتباسىلارىمەن اۋعانستان اۋە كۇشتەرىنە تيەسىلى ۇشاقتار، تىكۇشاقتار ارقىلى وزبەكستان مەن تاجىكستانعا ۇشىپ كەتكەن ەدى.
بۇل ۇشاقتى ءبىر كەزدەرى اۋعانستان ۇكىمەتىنىڭ اۋە كۇشتەرىنە امەريكالىق ارميا بەرگەن.
اقش قورعانىس مينيسترلىگىنىڭ مالىمەتىنشە، ۇرلانعان ۇشاقتاردىڭ 46-سى - وزبەكستاندا، 18-ءى تاجىكستاندا تۇر.
سول جىلدىڭ قىركۇيەگىندە وزبەكستان سىرتقى ىستەر مينيسترلىگى ەلگە زاڭسىز كىرگەن اۋعانستاننىڭ بارلىق بۇرىنعى اسكەري قىزمەتكەرلەرى مەن بەيبىت تۇرعىندارىنىڭ ءۇشىنشى ەلگە جەتكىزىلگەنىن حابارلادى. ال ۇشاقتىڭ تاعدىرى بەلگىسىز بولىپ قالعان بولاتىن.
كەيىننەن، 2022 جىلدىڭ ساۋىرىندە وزبەكستان پرەزيدەنتىنىڭ اۋعانستان بويىنشا ارنايى وكىلى يسماتۋللا يرگاشەۆ ۇشاق امەريكا بيلىگىنە قايتارىلاتىنىن ايتقان.
«اقش ۇكىمەتى ۇشاقتارعا اقشا تولەدى. ول بۇرىنعى اۋعانستان ۇكىمەتىن قارجىلاندىردى. وسىلايشا، ءبىز ۇشاققا قاتىستى شەشىمدى تولىعىمەن ۆاشينگتون شەشەدى دەپ سانايمىز»، - دەدى يرگاشەۆ.
الايدا 2022 جىلى «تاليبان» قوزعالىسى قۇرعان اۋعانستاننىڭ قورعانىس مينيسترلىگى وزبەكستان مەن تاجىكستانعا وتكەن جىلدىڭ تامىز ايىندا ورتالىق ازيانىڭ پوستكەڭەستىك رەسپۋبليكالارىنا ۇرلانعان تىكۇشاقتاردى قايتارۋ تۋرالى وتىنىشپەن جۇگىنگەن ەدى.
تاليبان قورعانىس مينيسترلىگىنىڭ ءباسپاسوز حاتشىسى تىكۇشاقتاردى قايتارعىسى كەلەتىنىن ايتتى.
«تىكۇشاقتار – اۋعان حالقىنىڭ مەنشىگى. ولاردى قازىرگى ۇكىمەتكە قايتارۋ كەرەك»، - دەدى حورازمي.
