اقش قورعانىس مينيسترلىگى يران اۋماعىنا جاسالعان سوققىعا بايلانىستى مالىمدەمەسىن جاريالادى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
پەنتاگون باسشىسى پيت حەگسەت اقش پەن يزرايل ارەكەتتەرى يراننىڭ اقش قارۋلى كۇشتەرى مەن الەمدەگى امەريكالىق مۇددەلەرگە قارسى باعىتتالعان كوپجىلدىق شابۋىلدارىنا جاۋاپ بولعانىن مالىمدەدى.
ونىڭ ايتۋىنشا، وپەراتسيانىڭ ماقساتى – ەلدىڭ شابۋىلداۋشى زىمىراندارىن، زىمىران ءوندىرىسىن، اسكەري-تەڭىز كۇشتەرىن جانە قاۋىپسىزدىك ينفراقۇرىلىمىن جويۋ، يادرولىق قارۋعا يە بولۋىنا جول بەرمەۋ.
ء“بىز بۇل سوعىستى باستاعان جوقپىز، بىراق پرەزيدەنت دونالد ترامپ تۇسىندا ونى اياقتايمىز. بۇل رەجيمدى اۋىستىرۋ سوعىسى ەمەس، الايدا رەجيم وزگەرۋى ءتيىس جانە الەم بۇدان ۇتادى”، – دەدى حەگسەت.
ول يران اۋماعىندا امەريكالىق قۇرلىق اسكەرلەرى جوق ەكەنىن راستادى. الايدا بولاشاقتاعى اسكەري ارەكەتتەرگە قاتىستى تولىق مالىمەت بەرۋدەن باس تارتتى.
سونىمەن قاتار قاقتىعىستىڭ ۇزاققا سوزىلاتىنى جونىندەگى بولجامداردى جوققا شىعاردى، بىراق ناقتى مەرزىمىن اتاعان جوق.
پەنتاگون باسشىسى اسكەري قيمىلداردىڭ ادام شىعىنىنا اكەلگەنىن راستادى. ونىڭ مالىمەتىنشە، ءتورت امەريكالىق اسكەري قىزمەتكەر قازا تاپقان.
ال اقش قارۋلى كۇشتەرى شتاب باستىقتارى بىرىككەن كوميتەتىنىڭ توراعاسى دەن كەين يرانداعى اسكەري ماقساتتارعا جەتۋ كۇردەلى بولاتىنىن جانە قوسىمشا كۇش-جىگەردى تالاپ ەتەتىنىن ايتتى.
