«ورتالىق ازيا - ەۋروپا وداعى» سامميتىنە قاتىسقان قازاقستان پرەزيدەنتى قاسىم-جومارت توقاەۆ ۋكرايناعا قاتىستى كەلىسسوز جايلى پىكىرىن ءبىلدىردى. بۇل تۋرالى اقوردا جازدى، دەپ حابارلايدى “ادىرنا” ۇلتتىق پورتالى.
“قازاقستان تەڭگەرىمدى سىرتقى ساياساتتى بەرىك ۇستانادى جانە بارلىق مۇددەلى مەملەكەتپەن، نەگىزگى حالىقارالىق قۇرىلىمدارمەن، سونىڭ ىشىندە ەۋروپا وداعىمەن ىنتىماقتاستىقتى كەڭەيتۋگە نيەتتى. مەنىڭ ويىمشا، جاھاندىق تۇراقسىزدىق شيەلەنىسە تۇسكەن كەزەڭدە الەمدەگى كۇردەلى وقيعالارعا باعا بەرۋدە بارىنشا بايىپتىلىق تانىتىپ، جاۋاپكەرشىلىكپەن قاراعان ءجون. كونسترۋكتيۆتى ديالوگ جۇرگىزىپ، بەيبىت جولمەن دامۋعا ۇمتىلۋ ماڭىزدى”، - دەپ توقتالدى پرەزيدەنت.
سونداي-اق ول الەم ەلدەرىن بۇۇ جارعىسى مەن جالپىعا ورتاق حالىقارالىق قۇقىق قاعيدالارىن مۇلتىكسىز ساقتاۋ ءۇشىن بارىنشا كۇش-جىگەر جۇمىلدىرۋعا، سونداي-اق باس حاتشى انتونيۋ گۋتەرريشتىڭ قىزمەتىنە قولداۋ بىلدىرۋگە شاقىردى.
«قازاقستان كەز كەلگەن قاقتىعىستىڭ بەيبىت جولمەن شەشىلۋىن جاقتايدى. سوندىقتان ۋكرايناعا قاتىستى كەلىسسوزدەردىڭ باستالۋىن قۇپتايمىز. ماسەلەنىڭ كۇردەلى ەكەنىن تۇسىنەمىز. دەگەنمەن شيەلەنىس وڭ شەشىمىن تابادى دەپ ۇمىتتەنەمىز»، - دەدى قاسىم-جومارت توقاەۆ.
ايتا كەتەيىك، وزبەكستاننىڭ سامارقاند قالاسىندا «ورتالىق ازيا - ەۋروپا وداعى» فورماتىنداعى العاشقى ءسامميتى ءوتتى.
كەشە پرەزيدەنت قاسىم-جومارت توقاەۆ وزبەكستانعا جۇمىس ساپارىمەن باردى. ونىڭ بارىسىندا مەملەكەت باسشىسى ەۋروپالىق كەڭەس پرەزيدەنتى انتونيۋ كوشتا، ەۋروپالىق كوميسسيا پرەزيدەنتى ۋرسۋلا فون دەر ليايەن، ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسومەن ەكىجاقتى كەزدەسۋلەر وتكىزدى.
