رەسەي پرەزيدەنتى ۆلاديمير پۋتين تاجىكستان پرەزيدەنتى ەمومالي راحموندى ءۇشىنشى دارەجەلى «وتانعا سىڭىرگەن ەڭبەگى ءۇشىن» وردەنىمەن ماراپاتتادى، دەپ حابارلايدى "ادىرنا" ۇلتتقى پورتالى ريا نوۆوستيگە سىلتەپ.
ەمومالي راحمون سەيسەنبى كۇنى ماسكەۋگە ەكى كۇندىك رەسمي ساپارمەن باردى. كەلىسسوزدەر جۇرگىزە وتىرىپ، پۋتين ەكى ەل اراسىنداعى قارىم-قاتىناستاردىڭ قارقىندى دامىپ كەلە جاتقانىن جانە ساياسي بايلانىس وتە جوعارى دەڭگەيدە ەكەنىن، رەسەي تاجىكستاننىڭ نەگىزگى ساۋدا-ەكونوميكالىق ارىپتەسى ەكەنىن اتاپ ءوتتى.
بيىل رەسەي فەدەراتسياسى مەن تاجىكستان رەسپۋبليكاسى اراسىنداعى دوستىق، ىنتىماقتاستىق جانە ءوزارا كومەك تۋرالى نەگىزگى شارتتىڭ جاسالعانىنا 30 جىل تولادى. تاجىكستان باسشىسى جوعارى ماراپاتقا ەكى ەل اراسىنداعى ستراتەگيالىق سەرىكتەستىك پەن وداقتاستىق قاتىناستارىن نىعايتۋعا، سونداي-اق ايماقتىق تۇراقتىلىق پەن قاۋىپسىزدىكتى قامتاماسىز ەتۋگە قوسقان زور جەكە ۇلەسى ءۇشىن يە بولدى.
«رەسەي-تاجىكستان قارىم-قاتىناستارىنداعى ەڭ ماڭىزدى جەتىستىكتەر – ساياسات، ەكونوميكا، ءبىلىم، مادەنيەت – وسى سالالار مەن تالپىنىستارعا مۇددەلى بەلسەندىلىگىڭىز جانە قولداۋىڭىزعا تىكەلەي بايلانىستى دەسەك، ارتىق ايتقاندىق بولماس»، – دەدى پۋتين ماراپاتتاۋ راسىمىندە.
ول ەلدەر اراسىنداعى كوپجىلدىق بىرلەسكەن جۇمىس بارىسىندا ءوزارا ءتيىمدى شەشىمدەر تابۋعا جانە رەسەي فەدەراتسياسى مەن تاجىكستان اراسىنداعى كوپ قىرلى ىنتىماقتاستىقتى بىرلەسىپ دامىتۋعا، ولاردى دايەكتى تۇردە قۇرۋعا مۇمكىندىك بەرەتىن «شىنايى دوستىق، جەمىستى، سەنىمدى قارىم-قاتىناستار» قالىپتاسقانىن اتاپ ءوتتى.
