مەملەكەت باسشىسى اقش-تا مارك رۋبيومەن جانە دونالد ترامپ اكىمشىلىگىنىڭ وكىلدەرىمەن كەزدەستى، دەپ حابارلايدى “ادىرنا” ۇلتتىق پورتالى.
قازاقستان پرەزيدەنتى قاسىم-جومارت توقاەۆتىڭ ۆاشينگتونعا رەسمي ساپارى اقش مەملەكەتتىك حاتشىسى مارك رۋبيومەن، ساۋدا ءمينيسترى گوۆارد لاتنيكپەن، سونداي-اق اقش پرەزيدەنتىنىڭ وڭتۇستىك جانە ورتالىق ازيا جونىندەگى ارنايى وكىلى سەردجيو گورمەن كەزدەسۋدەن باستالدى.
كەزدەسۋ بارىسىندا تاراپتار ەكىجاقتى جانە وڭىرلىك كۇن ءتارتىبىنىڭ وزەكتى ماسەلەلەرىن، سونىڭ ىشىندە ەكونوميكالىق ىقپالداستىق، ينۆەستيتسيالىق ارىپتەستىك جانە ايماقتىق قاۋىپسىزدىك ماسەلەلەرىن تالقىلادى.
مەملەكەت باسشىسى قازاقستان مەن امەريكا قۇراما شتاتتارىنىڭ اراسىنداعى ستراتەگيالىق سەرىكتەستىكتى جاڭا دەڭگەيگە كوتەرۋگە، ونەركاسىپ پەن بيزنەستى قولداۋعا، سونداي-اق جاڭا جۇمىس ورىندارىن اشۋعا باعىتتالعان ەكونوميكالىق ىنتىماقتاستىقتىڭ ماڭىزدى ءرول اتقاراتىنىن اتاپ ءوتتى.
پرەزيدەنتتىڭ ايتۋىنشا، قازاقستان بۇگىندە اقش-پەن جوعارى دەڭگەيدەگى ساياسي بايلانىستار ورناتقان جانە سان قىرلى ىنتىماقتاستىقتى تەرەڭدەتۋ جونىندەگى كونسترۋكتيۆتى ديالوگتى جالعاستىرۋعا ءازىر.
ساپار اياسىندا قازاقستان مەن اقش اراسىندا اسا ماڭىزدى مينەرالدار سالاسىندا ىنتىماقتاستىق ورناتۋ جونىندەگى ءوزارا تۇسىنىستىك تۋرالى مەموراندۋمعا قول قويىلدى.
قۇجاتقا قر ونەركاسىپ جانە قۇرىلىس ءمينيسترى ەرسايىن ناعاسپاەۆ پەن اقش ساۋدا ءمينيسترى گوۆارد لاتنيك قول قويدى.
بۇل مەموراندۋم ەكى ەل اراسىنداعى يننوۆاتسيالىق دامۋ مەن جوعارى تەحنولوگيالار باعىتىنداعى سەرىكتەستىكتى تەرەڭدەتۋگە، سونداي-اق جاڭا ەكونوميكالىق مۇمكىندىكتەر اشۋعا نەگىز بولماق.
