ارنايى كوميسسيا قاراعاندىدا ورنالاسقان «YDD Corporation» جشس فەرروقورىتپا زاۋىتىندا بولعان توپتىق جازاتايىم وقيعادا جۇمىس بەرۋشىنىڭ كىناسىن انىقتادى. بۇل تۋرالى بۇگىن، 23 تامىزدا ەڭبەك جانە حالىقتى الەۋمەتتىك قورعاۋ مينيسترلىگى ايتتى، دەپ حابارلايدى «ادىرنا» ءتىلشىسى.
«نەگىزگى كىنا جۇمىس بەرۋشىدە ەكەنىن انىقتالدى. كاسىپورىندا تراۆماتيكالىق فاكتورلاردىڭ اسەرىن بولدىرماۋ ءۇشىن شۇعىل شارالار ءتيىستى دارەجەدە قابىلدانباعانى، قاۋىپسىز ەڭبەك جاعدايلارى مەن قىزمەتكەرلەردىڭ ەرەجەلەردى، نۇسقاۋلىقتاردى جانە تەحنولوگيالىق ءتارتىپتى ساقتاۋىن باقىلاۋ ەلەمەنتتەرى ءتيىستى دارەجەدە جاسالماعانى بەلگىلى بولدى»،—دەلىنگەن حابارلامادا.
كوميسسيا مۇشەلەرى زارداپ شەككەندەرمەن جانە ولاردىڭ وتباسى مۇشەلەرىمەن كەزدەسىپ، قولدانىستاعى زاڭناماعا سايكەس ولاردىڭ الەۋمەتتىك قورعاۋعا زاڭدى قۇقىعى ءتۇسىندىرىلدى. تەرگەۋ ناتيجەلەرى جانە جينالعان بارلىق ماتەريالدار جازاتايىم وقيعاعا كىنالى دەپ تانىلعان ادامداردى جاۋاپقا تارتۋ ءۇشىن قۇقىق قورعاۋ ورگاندارىنا بەرىلەدى.
سونداي-اق كوميسسيا «YDD Corporation» جشس باسشىلىعىنا اپاتتىڭ سەبەپتەرىن جويۋ جانە الداعى ۋاقىتتا وسىنداي جاعدايلاردىڭ الدىن الۋ جونىندە شارالار كەشەنىن قابىلداۋعا قاۋلى ەتتى.
ەسكە سالايىق، 20 شىلدەدە قاراعاندى قالاسىنداعى «YDD Corporation» فەرروقورىتپا زاۋىتىندا توتەنشە جاعداي بولعان ەدى. ناتيجەسىندە سەگىز جۇمىسشى زارداپ شەگىپ، ولاردىڭ تورتەۋى قازا تاپتى.
