Arnaıy komıssııa Qaraǵandyda ornalasqan «YDD Corporation» JShS ferroqorytpa zaýytynda bolǵan toptyq jazataıym oqıǵada jumys berýshiniń kinásin anyqtady. Bul týraly búgin, 23 tamyzda Eńbek jáne halyqty áleýmettik qorǵaý mınıstrligi aıtty, dep habarlaıdy «Adyrna» tilshisi.
«Negizgi kiná jumys berýshide ekenin anyqtaldy. Kásiporynda travmatıkalyq faktorlardyń áserin boldyrmaý úshin shuǵyl sharalar tıisti dárejede qabyldanbaǵany, qaýipsiz eńbek jaǵdaılary men qyzmetkerlerdiń erejelerdi, nusqaýlyqtardy jáne tehnologııalyq tártipti saqtaýyn baqylaý elementteri tıisti dárejede jasalmaǵany belgili boldy»,—delingen habarlamada.
Komıssııa músheleri zardap shekkendermen jáne olardyń otbasy múshelerimen kezdesip, qoldanystaǵy zańnamaǵa sáıkes olardyń áleýmettik qorǵaýǵa zańdy quqyǵy túsindirildi. Tergeý nátıjeleri jáne jınalǵan barlyq materıaldar jazataıym oqıǵaǵa kináli dep tanylǵan adamdardy jaýapqa tartý úshin quqyq qorǵaý organdaryna beriledi.
Sondaı-aq komıssııa «YDD Corporation» JShS basshylyǵyna apattyń sebepterin joıý jáne aldaǵy ýaqytta osyndaı jaǵdaılardyń aldyn alý jóninde sharalar keshenin qabyldaýǵa qaýly etti.
Eske salaıyq, 20 shildede Qaraǵandy qalasyndaǵy «YDD Corporation» ferroqorytpa zaýytynda tótenshe jaǵdaı bolǵan edi. Nátıjesinde segiz jumysshy zardap shegip, olardyń tórteýi qaza tapty.
