تاراز ءتۋريزمنىڭ ورتالىعىنا اينالماق

3894
Adyrna.kz Telegram

تۋريزم سالاسىن دامىتۋ بويىنشا اتقارىلىپ جاتقان كەشەندى جۇمىستاردىڭ ناتيجەسىندە وبلىستا تۋريستەر لەگىنىڭ ءوسۋ ديناميكاسى بايقالىپ وتىر. بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا وتكەن ءباسپاسوز كونفەرەنتسياسىندا وبلىستىق تۋريزم باسقارماسىنىڭ باسشىسى قارلىعاش ارالبەكوۆا مالىمدەدى.

باسقارما باسشىسىنىڭ ايتۋىنشا، وسى جىلدىڭ قاڭتار-ناۋرىز قورىتىندىلارى بويىنشا وبلىستا كەلۋشىلەردى ورنالاستىرۋمەن شۇعىلداناتىن ورنالاستىرۋ ورىندارىنىڭ سانى 181 بىرلىكتى قۇراعان.

– ناقتىراق ايتساق، ونداعى ورنالاستىرۋ ورىندارى سانى 2005 بولمە بولسا، بىرجولعى سىيىمدىلىق 3872 توسەك-ورىندى قۇرايدى. ولارمەن 30984 ادامعا قىزمەت ۇسىنىلىپ، قىزمەت كورسەتىلگەن كەلۋشىلەردىڭ سانى وتكەن جىلعى ءتيىستى كەزەڭمەن سالىستىرعاندا ەسەپتى كەزەڭدە 21,4%-عا ارتتى.        ەسەپتى كەزەڭدە ورنالاستىرۋ ورىندارىندا 261759 مىڭ تەڭگە سوماسىنا قىزمەت كورسەتىلدى. 2019 جىلعى قاڭتار-ناۋرىز قورىتىندىلارى بويىنشا رەزيدەنت ەمەس كەلۋشىلەردiڭ سانى 17,9%-عا ارتتى. ماسەلەن 2018 جىلدىڭ قاڭتار-ناۋرىز ايلارىندا كەلۋشىلەر 750 بولسا، ال بيىلعى جىلدىڭ ءدال وسى ايلاىرندا 884 ادامعا جەتتى. ستاتيستيكالىق مالىمەتتەرگە سايكەس 2019 جىلدىڭ قاڭتار-ماۋسىم ايلارى ارالىعىنداعى (6 اي) تۋريزم سالاسى بويىنشا نەگىزگى كاپيتالعا سالىنعان ينۆەستيتسيالاردىڭ اۋماقتىق كولەمى – 3 ملرد 521 ملن 639 مىڭ تەڭگەنى قۇرادى، – دەيدى باسقارما باسشىسى.

قارلىعاش امىرقىزىنىڭ ايتۋىنشا، جامبىل وبلىسى ەكونوميكاسىنىڭ باسىمدى باعىتتارىنىڭ ءبىرى رەتىندە تۋريزم سالاسىنىڭ دامۋىنا ەرەكشە كوڭىل ءبولىنىپ وتىر. قازىرگى تاڭدا جوسپارلانعان ماقسات پەن مىندەتتەرگە قول جەتكىزۋ ءۇشىن وبلىستىڭ وڭ تۋريستىك ءيميدجىن قالىپتاستىرۋ جۇمىستارى جۇرگىزىلۋدە. اتاپ ايتساق،  وڭىرگە تۋريستەردى كوپتەپ تارتۋ ءۇشىن قاجەتتى ينفراقۇرىلىممەن قامتاماسىز ەتۋ جۇمىستارى اتقارىلىپ جاتىر.

– جامبىل وبلىسى مەن ونىڭ ورتالىعى تاراز قالاسى تاريحي ءوڭىر بولعاندىقتان ءتۋريزمدى دامىتۋعا قولايلى ايماق بولىپ سانالادى. ناقتىراق ايتساق، وبلىستا 3 365 تاريحي-مادەني مۇرا ەسكەرتكىشتەرى ورنالاسقان، ونىڭ ىشىندە 2 934 ارحەولوگيالىق، 111- تاريحي، 97 ارحيتەكتۋرالىق نىسان بولىپ سانالادى.  ۇلى جىبەك جولىنىڭ بويىندا ورنالاسقان 5 نىسان يۋنەسكو-ءنىڭ دۇنيەجۇزىلىك مۇرالار تىزىمىنە ەنگەن. ماسەلەن اقتوبە (بالاساعۇن), قۇلان، ورنەك، اقىرتاس جانە قوستوبە قالاشىقتارىنا قىزىعۋشىلىق جوعارى. سونداي-اق «اقىرتاس» ساراي كەشەنى مەن «ايشا ءبيبى» ماۆزولەيى ەۋرازيا ەكونوميكالىق ىنتىماقتاستىق ۇيىمىنىڭ «ەرەكشە تارتىمدى تۋريستىك نىساندار» تىزىلىمىنە ەنگىزىلگەن، – دەيدى ول.

قارلىعاش امىرقىزى وبلىس ءتۋرزيمىن دامىتۋ ءۇشىن جول ءجۇرۋدى جەڭىلدەتۋدىڭ ماڭىزدى ەكەنىن ايتادى.  1 مامىردان  باستاپ  «Fly Arystan» كومپانياسى «الماتى-تاراز-الماتى» باعىتىندا جولاۋشىلارعا قىزمەت كورسەتەتىن بولادى. اتالعان باعىتتىڭ اشىلۋى  ىشكى تۋريزم بويىنشا كەلەتىن تۋريستەر لەگىن ۇلعايتاتىن ماڭىزدى فاكتورلارىنىڭ ءبىرى بولىپ وتىر.

پىكىرلەر