اتا-انالاردىڭ جەتكىلىكتى كوڭىل بولمەگەنىنەن بالالاردىڭ تەرەزەدەن قۇلاۋى جيىلەپ بارادى. الەۋمەتتانۋشى ونىڭ ءبىر سەبەبىن ۇيالى تەلەفون، الەۋمەتتىك جەلىمەن بايلانىستىرسا، توتەنشە جاعداي قىزمەتى ەسكەرتۋ جاريالاۋمەن شەكتەلگەن. قايتسە بالانى اجال تەرەزەسىنەن امان الىپ قالۋعا بولادى؟
بيىلعى جاز ايلارىندا بالالاردىڭ تەرەزەدەن قۇلاۋ وقيعالارى جيىلەپ كەتتى. كۇندە، كۇنارا ەستيتىن اقپاراتتىڭ ءبىرى – وسى. بىلتىر ءبىر جىل ىشىندە تەرەزەدەن قۇلاعان پەرىشتەلەر سانى 170 بولسا، بيىل قازىرگە دەيىن تەرەزەدەن قۇلاعان بالالار سانى 120-دەن اسىپ كەتتى. ال 2020 جىلى ءبىر جىل ىشىندە تەرەزەدەن قۇلاعان بالالار سانى رەسمي مالىمەت بويىنشا 105 بولعان.
وكىنىشكە وراي، مۇنداي جاعدايلار بالانىڭ اۋىر جارالانۋىنا عانا ەمەس، ولىمىنە دە سەبەپ بولىپ وتىر. ومىرباقي وسىنىڭ زاردابىن تارتىپ تىرشىلىك كەشەتىندەر تۋرالى ايتا الماي وتىرمىز.
اتا-انا قايدا قارايدى؟
3 تامىز كۇنى ءبىر كۇن ىشىندە ەلىمىزدىڭ ءار ايماعىندا ءۇش بىردەي بالانىڭ تەرەزەدەن قۇلاعانى حابارلاندى. تەمىرتاۋ قالاسىندا التى جاسار ۇل بالا ءۇشىنشى قاباتتان قۇلاپ، ءتۇرلى جاراقاتتارمەن اۋرۋحاناعا جەتكىزىلسە، استانا قالاسىندا ءبىر جاسار بالا بەسىنشى قاباتتىڭ تەرەزەسىنەن قۇلاعان. سونداي-اق، سەمەي قالاسىندا 2020 جىلى تۋعان قىز بالا بەسىنشى قاباتتان قۇلاپ، العان جاراقاتتارىنىڭ اسەرىنەن وقيعا ورنىندا قايتىس بولدى. اتالعان ءۇش وقيعادا دا بالالار اتا-اناسىنىڭ قاراۋىنسىز قالعان.
شىعىس قازاقستان وبلىسى توتەنشە جاعدايلار دەپارتامەنتىنىڭ ءباسپاسوز حاتشىسى مارينا ليسكوۆانىڭ ايتۋىنشا 7 تامىز كۇنى ۇلكەن نارىن اۋىلىندا ۇيىندە ەرەسەكتەردىڭ قاراۋىنسىز قالعان ەكى جاسار بالا ەكىنشى قاباتتان قۇلاپ، اۋرۋحاناعا جاتقىزىلعان.
- ەرەسەكتەردىڭ باقىلاۋىنسىز قالعان بالالاردى ساقتاندىرۋ ماقساتىندا شقو توتەنشە جاعدايلار دەپارتامەنتىنىڭ قىزمەتكەرلەرى تۇرعىن ۇيلەر اۋماعىنا ديناميكپەن جابدىقتالعان ارنايى درون ۇشىرىپ، تەرەزەلەر اشىق بولعان جەردە تۇرعىندارعا قاۋىپسىزدىك ەرەجەلەرىن ايتىپ، بالالاردى قاراۋسىز قالدىرۋ قانشالىقتى قاۋىپتى ەكەنىن ەسكە سالدى، - دەيدى شقو تجد ءباسپاسوز حاتشىسى مارينا ليسكوۆا.
بىراق بۇدان ماسەلە شەشىلە مە؟
سەبەپتىڭ ءبىرى – ۇيالى تەلەفون
الەۋمەتتانۋشى ايجان شابدەنوۆا قازىرگى زاماننىڭ بالالارى شيراق، سول سەبەپتى ولاردى مۇلدە نازاردان تىس قالدىرۋعا بولمايدى دەيدى.
- تاعى ءبىر جايت – قازىرگى اتا-انالار ۇيالى تەلەفوننان باس الماي، ءتۇرلى الەۋمەتتىك جەلىلەرگە كىرىپ كەتەدى. سونىڭ اسەرىنەن بالالار قاراۋسىز قالىپ، ءتۇرلى قايعىلى جاعدايلار ورىن الۋدا. دەگەنمەن بۇل ماسەلەنىڭ تەك ءبىر عانا سەبەبى، - دەيدى ايجان شابدەنوۆا.
الەۋمەتتانۋشى بالانىڭ قاراۋسىز قالۋىنا وتباسىنىڭ الەۋمەتتىك جاعدايىنىڭ اسەرى جوق ەكەنىن العا تارتتى. ونىڭ ايتۋىنشا مۇنداي جاعداي ءار ءتۇرلى وتباسىدا بولۋى مۇمكىن.
- قايعىلى جاعدايلار ورىن الماس ءۇشىن، الەۋمەتتىك جەلىلەر مەن ءباسپاسوز بەتتەرىندە بالانىڭ باقىلاۋسىز قالۋىنىڭ سوڭى قانداي جاعدايمەن اياقتالاتىنىن كوبىرەك ايتىپ، اتا-انالاردى ساقتاندىرۋ قاجەت، - دەپ پىكىرىمەن ءبولىستى الەۋمەتتانۋشى.
تجم ەسكەرتەدى، ەگەر ادامزات ەسكەرسە
بالالاردىڭ كوپقاباتتى ۇيلەردىڭ تەرەزەلەرىنەن قۇلاۋىمەن بايلانىستى جازاتايىم وقيعالاردىڭ الدىن الۋ ماقساتىندا توتەنشە جاعدايلار مينيسترلىگى قاۋىپسىزدىك شارالارىن ساقتاۋدى ەسكەرتەدى:
- ۇيدە كىشكەنتاي بالا بولسا، تەرەزەلەردى اشىق قالدىرماڭىز. ويتكەنى نازارىڭىزدى ءبىر سەكۋندقا باسقا جاققا اۋدارۋدىڭ ءوزى بالانىڭ ومىرىندەگى سوڭعى ءسات بولۋى نەمەسە ونىڭ ءبىرجولا مۇگەدەك بولىپ قالۋى ءۇشىن جەتكىلىكتى;
- تەرەزەنى ءتيىستى قورعاۋمەن جابدىقتالماعان موسكيت تورلارىن پايدالانباڭىز. بالالار مۇنداي تورلارعا سۇيەنىپ، ناتيجەسىندە ولارمەن بىرگە قۇلاپ تۇسەدى;
- بالالار وزدىگىنەن تەرەزەنى اشا المايتىنداي ەتىپ، قاۋىپسىزدىك قۇلىپتارىن ورناتىڭىز;
- بالانى قاراۋسىز قالدىرماڭىز، اسىرەسە تەرەزەلەر مەن شىنى ەسىكتەردىڭ جانىندا ويناۋعا جول بەرمەڭىز;
- بالالار تەرەزەنىڭ الدىنا شىعا الاتىنداي جيھازداردى ونىڭ جانىنا قويماڭىز.
اجال تەرەزەسى
ستاتيستيكاعا سۇيەنەتىن بولساق، جىل باسىنان بەرى تۇرعىن ۇيلەردىڭ تەرەزەسىنەن 102 بالا قۇلادى. بۇل – تەك تىركەلگەن وقيعالار عانا. وسى وقيعا سالدارىنان 7 بالا قازا تاۋىپ، 95 بالا ءتۇرلى جاراقاتتارمەن اۋرۋحاناعا جاتقىزىلعان.
تجم مالىمەتىنشە، استانا قالاسىندا – 18, قىزىلوردا وبلىسىندا – 13, قاراعاندى وبلىسىندا – 12 بالا تەرەزەدەن قۇلاعان. باتىس قازاقستان، قوستاناي، پاۆلودار وبلىستارىندا 6 وقيعا تىركەلسە، اتىراۋ، اقمولا، اباي، ماڭعىستاۋ، ۇلىتاۋ وبلىستارىندا 5 جاعداي ورىن العان.
ەسكە سالا كەتەيىك، وتكەن جىلى تىركەلگەن وقيعا بويىنشا 170 بالا تەرەزەدەن قۇلاعان. 2-13 جاس ارالىعىنداعى بالالار قاراۋسىز قالىپ، تەرەزەگە وزدىگىنەن كوتەرىلىپ، تىرەۋىش رەتىندە ءارتۇرلى جيھازداردى قولدانعان نەمەسە موسكيت تورىنا سۇيەنىپ، تەرەزەدەن قۇلاپ كەتكەن. قايتالاپ ەسكە سالايىق، بۇل رەسمي تىركەلىپ، حابارلانعاندارى عانا.
مەرەي مىرزاعاليقىزى
«ادىرنا» ۇلتتىق پورتالى
