قىدىربەك رىسبەك. الەمدىك دەڭگەيدەگى باپكەر

922
بۇگىن، ياعني 13 قىركۇيەك - قازاق بوكسىنا ءبىر كىسىدەي ەڭبەگى سىڭگەن باپكەر مىرزاعالي ايتجانوۆتىڭ تۋعان كۇنى. "ادىرنا" ۇلتتىق پورتالىنىڭ ۇجىمى داڭقتى باپكەردى تۋعان كۇنىمەن قۇتتىقتاي وتىرىپ، ۇزاق عۇمىر، جەمىستى ەڭبەك تىلەيدى.
2013-2014 جىلداردىڭ قورىتىندىسى بويىنشا دۇنيە ءجۇزىنىڭ ەكى مارتە ەڭ ۇزدىك جاتتىقتىرۋشىسى اتانعان جالعىز قازاق باپكەرى. 2009-2018 جىلدارى قازاقستان قۇراماسىنىڭ باس باپكەرى بولدى. الەم چەمپيوندارى قايرات ەراليەۆ پەن ءبىرجان جاقىپوۆتىڭ، وليمپيادا ويىندارى مەن الەم چەمپيوناتىنىڭ قولا جۇلدەگەرى ەركەبۇلان شىناليەۆتىڭ، الەم چەمپيوناتىنىڭ مەداليسى ساكەن بيبوسىنوۆتىڭ جانە ازيا چەمپيونى بەك نۇرماعانبەتتىڭ باپكەرى.
2009 جىلدىڭ كۇزىندە قازاق ەلى قۇراماسىنىڭ باس باپكەرى قىزمەتىنە تاعايىندالعان مىرزاعالي قۇلانۇلى 60 جىلدىق تاماشا ءداستۇرى بار رەسپۋبليكا بوكسىن جاڭا بەلەسكە كوتەرۋگە بىلەك سىبانا كىرىستى. 2013 جىلى قازاق جىگىتتەرى الەم چەمپيوناتىندا بۇرىن-سوڭدى بولماعان اسۋعا تابان تىرەدى. الماتىداعى الەمدىك بىرىنشىلىكتە ءبىزدىڭ بوكسشىلار 4 التىن، 2 كۇمىس، 2 قولا مەدالدى ەنشىلەپ، دۇنيە ءجۇزى بويىنشا كوماندالىق ەسەپتە 1-ورىندى جەڭىپ الدى. وسى جىلى مىرزاعاليدىڭ كومانداسى يوردانيادا بولعان ازيا چەمپيوناتىندا 7 «التىندى» ولجالاعان ەدى. بۇل - قازاق قۇراماسىنىڭ ازيا چەمپيوناتتارىنداعى رەكوردتىق ناتيجەسى بولاتىن.
2013 جىلدىڭ قورىتىندىسى بويىنشا مىرزاعالي ايتجانوۆ 196 مەملەكەتتىڭ بوكس فەدەراتسياسىن بىرىكتىرەتىن ايبا-نىڭ ۇيعارۋىمەن جۇمىر جەردىڭ ەڭ تاڭداۋلى جاتتىقتىرۋشىسى مارتەبەسىنە يە بولسا، دانيار ەلەۋسىنوۆ الەمنىڭ ەڭ ۇزدىك بوكسشىسى اتاندى.
مىرزاعالي باپتاعان قۇراما 2014 جىلى ينچحونداعى ازيا ويىندارىندا دا رەكوردتىق بەلەسكە يەك ارتتى. بۇعان دەيىنگى بەس ازيا ويىندارىندا ءۇش التىن مەدالدان ارتىق ولجالاپ كورمەگەن قازاق بوكسشىلارى وسى جولى 6 التىن جۇلدەنى قانجىعاعا بايلادى. ون سالماقتىڭ التاۋىندا قازاقتار توپ جاردى! ازيا قۇرلىعىندا 40-تان استام ەل بارىن ەسكەرسەك، بۇل دەگەنىڭىز تالاي الپاۋىت مەملەكەتتەردىڭ تۇسىنە دە كىرمەيتىن جەتىستىك. وسىنداي رەكوردتىق جەڭىستىڭ ناتيجەسىندە جانە الەمدىك رەيتينگتە ب. جاقىپوۆ، د. ەلەۋسىنوۆ، ج. ءالىمحانۇلى، ي. دىچكو سەكىلدى شاكىرتتەرى جەكە-دارا كوش باستاپ، بۇعان قوسا تاعى ءۇش-ءتورت سپورتشىسى ۇزدىك ۇشتىككە ەنگەن مىرزاعالي ايتجانوۆ 2014 جىلدىڭ سوڭىندا الەمنىڭ ەڭ ۇزدىك جاتتىقتىرۋشىسى اتاعىنا ەكىنشى مارتە يە بولدى. ەندەشە، قازاقستان سپورتىنىڭ تاريحىندا ەكى جىل قاتارىنان جەر شارىنىڭ ەڭ ۇزدىك جاتتىقتىرۋشىسى اتانعان جالعىز مامان - مىرزاعالي ايتجانوۆ ەكەنىن حاتقا ءتۇسىرىپ قويعانىمىز ارتىق بولماس.
ماتەريال اۆتوردىڭ facebook پاراقشاسىنان
سۋرەت اشىق دەرەككوزدەن الىندى
پىكىرلەر