Senat Töraǧasy Mäulen Äşımbaev Şymkent qalasynyŋ mäslihat deputattarymen kezdestı. Onda Memleket basşysy Joldauda jäne Ükımettıŋ keŋeitılgen otyrysynda bergen tapsyrmalardy ıske asyruǧa jolyndaǧy mındetter, qalanyŋ damuyna tigızetın Senattyŋ yqpaly jäne Palata men mäslihattardyŋ bırlesken jūmysynyŋ jaŋa formaty talqylandy.
Is-şarada Mäulen Äşımbaev Memleket basşysynyŋ bastamasymen elımızde Ädılettı Qazaqstan qūru, memlekettılıktı nyǧaitu jäne azamattardyŋ äl-auqatyn arttyru jolynda keşendı reformalar jüzege asyrylyp jatqanyn atap öttı. Būl baǧyttaǧy belgılengen mındetterdı oryndau barlyq müddelı taraptyŋ belsendı ärı jüielı özara ıs-qimylyn talap etedı. Sondai-aq atalǧan salada jūmystyŋ jaŋa formaty qajet.
«Prezidentımız Qasym-Jomart Kemelūly Toqaevtyŋ bastamasymen qolǧa alynǧan reformalardyŋ nätijesınde äleumettık-ekonomikalyq jäne saiasi salada ülken özgerıster boldy. Bilık tarmaqtarynyŋ arasyndaǧy teŋgerımdılık küşeiıp, saiasi bäsekelestık artty. Sondai-aq memlekettık instituttar keşendı türde jaŋǧyrtyldy. Sonyŋ nätijesınde qazırgı taŋda el ekonomikasynyŋ jaŋa ülgısın qalyptastyru üşın däiektı jūmystar jürgızılıp keledı. Mūndai naqty qadamdar azamattardyŋ äl-auqatyn arttyryp, öŋırlerdıŋ damuyna tyŋ serpın beredı dep senemız», – dedı Senat Spikerı.
Mäulen Äşımbaev öz sözınde Parlamenttıŋ segızınşı şaqyrylymynyŋ ekınşı sessiiasyn qorytyndylai kele, Senat pen mäslihattardyŋ bırlesken jūmysynyŋ maŋyzdy basymdyqtaryna toqtaldy. Sonymen bırge Palata Spikerı zaŋ şyǧaru qyzmetıne mäslihat deputattary, sarapşylar men azamattyq qoǧam ökılderı belsendı jūmyldyrylǧanyn tılge tiek ettı. Senat Töraǧasynyŋ aituynşa, jergılıktı ökıldı organdardyŋ ūsynystary men bastamalary öŋırlerdı damytuǧa qatysty mäselelerdı şeşu kezınde maŋyzdy röl atqaruǧa tiıs.
«Parlament būl sessiiada 102 zaŋ qabyldady. Onyŋ ışınde qoǧamdyq baqylaudy küşeitu, äielder men balalardyŋ qūqyqtaryn qorǧau, adam saudasyna qarsy ıs-qimyl siiaqty asa maŋyzdy mäselelerdı qamtityn zaŋdar bar. Senatorlar ünemı öŋırlerge baryp, jergılıktı jerlerdegı ärıptesterımen bırge tūrǧyndarmen kezdesıp, özektı problemalardy şeşu joldaryn talqylady. Sonyŋ nätijesınde Ükımetke jäne tiıstı memlekettık organdarǧa 200 deputattyq saual joldandy. Aldaǧy sessiia kezınde de bırlesken jūmysymyzdy osy qarqynmen jalǧastyramyz dep senemın», – dedı Mäulen Äşımbaev.
Sondai-aq kezdesude megapolistegı özektı tüitkılder, naqty aitqanda, infraqūrylym jäne logistika mäselelerın şeşu barysy talqylandy. Atalǧan problemalardyŋ oŋ şeşımın tabu üşın respublikalyq biudjetten qarajat bölu mäselesı de söz boldy.
«Şymkentte jedel şeşudı qajet etetın maŋyzdy mäseleler bar. Būl, eŋ aldymen, Memleket basşysynyŋ tapsyrmasymen halyqaralyq sauda-logistikalyq ortalyǧyn saluǧa qatysty ekenın atap ötken jön. Batys ainalma jolyn jäne basqa da baǧyttardaǧy joldardy salu da negızgı mındet. Şymkent üşın mümkındıgı şekteulı jandardy oŋaltu ortalyǧynyŋ qūrylysy da özektı. Sondyqtan aldaǧy sessiiada respublika biudjetın qaraǧan kezde senatorlar atalǧan basymdyqtardy jäne mäslihat deputattarynyŋ ūsynystaryn nazarǧa alady», – dedı Mäulen Äşımbaev.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz