قازاقستاندىق ءانشى ديماش قۇدايبەرگەن قىتايدىڭ "I am a Singer" بايقاۋىنىڭ گالا-كونتسەرتىندە جاڭا تۋىندىسىنىڭ تۇساۋىن كەستى، دەپ حابارلايدى "ادىرنا" ۇلتتىق پورتالى.
ءاننىڭ مۋزىكاسى مەن ءسوزىن قازاقتىڭ بەلگىلى كومپوزيتورى رەنات گايسين مەن اقىن قالكامان سارين جازعان. ال سۋ جاڭا تۋىندىنىڭ ارانجيروۆكاسىن رەنات گايسين دىبىس پروديۋسەرى ەرلان بەكچۋرينمەن بىرلەسىپ جاساعانى حابارلاندى.
ديماش ارنايى قىتاي كورەرمەندەرى ءۇشىن قازاق جانە قىتاي تىلىندە ءان شىرقادى. قىتاي تىلىندەگى ءماتىننىڭ اۆتورى — لين ۆەي ۆەيليم.
رەنات گايسين ديماش قۇدايبەرگەن تۋرالى اقپارات تاراتاتىن DimashNews رەداكتسياسىنا ءاننىڭ جاسالۋ تاريحى تۋرالى ويىن ءبولىستى.
"بىرنەشە جىل بۇرىن ۇشاق تەرەزەسىنەن اقشا بۇلتتارعا قاراپ وتىرىپ ەرەكشە ادەمى سۋرەتتەن شابىتتانىپ، ويىما ادەمى ءبىر اۋەن ورالدى. سول ارادا اۋەندى ۇمىتىپ قالمايىن دەپ ءوزىمنىڭ دىبىس جازۋ قۇرىلعىما جازىپ قويدىم. پاندەميا كەزىندە «Qairan Elim» كومپوزيتسياسىن ازىرلەۋ ۇستىندە بۇل اۋەندى ديماشقا كورسەتتىم. بىراق تىنىمسىز ساياحات پەن گاسترولدىك ساپارلار كوبەيىپ كەتكەن سوڭ بۇل انمەن اينالىسۋعا ەندى عانا مۇمكىندىك تۋدى. جاقىندا ديماش ماعان تەلەفون سوعىپ، «I am a Singer» گالا-كونتسەرتىندە وسى ءاندى ورىنداعىسى كەلەتىنىن ايتتى. ول ءماتىندى قازاق تىلىنە تارجىمەلەۋىمدى ءوتىندى. كوپ ويلانباستان بىردەن ءوزىمنىڭ جاقىن دوسىم، ەلدەگى ەڭ تالانتتى اقىنداردىڭ ءبىرى قالقامان سارينگە تەلەفون سوقتىم. ءبىز تەلەفون ارقىلى حابارلاسقان سوڭ قالقامان اۋەننەن شابىتتانىپ، نازىك سەزىمدى انگە ولەڭ جازدى. مەن بۇنى — كومپوزيتور مەن اقىننىڭ ءبىرىن-ءبىرى ءسوزسىز تۇسىنىسۋىندەگى ناعىز ۇيلەسىمدىلىك دەپ اتاي وتىرىپ، شىعارمانى رومانتيكالىق پوەما دەگىم كەلەدى. انگە ديماشتىڭ ءوزى شىنايى، تازا جانە باعا جەتپەس ماحابباتتىڭ بەلگىسى رەتىندە «Angel love» دەگەن ات قويدى", — دەيدى سازگەر.
