پاۆلوداردا بيۋدجەت قاراجاتىن جىمقىرعان بۋحگالتەر سوتتالدى. بۇل تۋرالى وبلىستىق سوت مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، 2022 جىلدىڭ قاڭتارىنان باستاپ 2024 جىلدىڭ ناۋرىزىنا دەيىن پاۆلودار قالاسىنداعى № 4 بوبەكجاي-باقشاسىنىڭ بۋحگالتەرى شارۋاشىلىق مەڭگەرۋشىسىمەن ءسوز بايلاسىپ، ەسەپتىك-تولەۋ تۋرالى ءتىزىمدى زاڭسىز جاساعان. ەكەۋى شوتتارىنا زاڭسىز اقشا اۋدارىپ، مەملەكەتكە جالپى سوماسى 41 ميلليون تەڭگەدەن استام ماتەريالدىق زالال كەلتىرگەن.
ودان بولەك، وسىعان ۇقساس قىلمىستىق سحەمانى پايدالانىپ، ب.ا. 2023 جىلدىڭ قىركۇيەگى مەن 2024 جىلدىڭ مامىرى ارالىعىندا "پاۆلودار قالاسىنىڭ №7 بوبەكجاي-باقشاسى" مقكك-نىڭ بۋحگالتەرى بولىپ قىزمەت اتقارىپ، جالپى سوماسى 5 ميلليون تەڭگەدەن استام بيۋدجەت قاراجاتىن جىمقىرعان.
"سونداي-اق بۋحگالتەر پاۆلودار قالاسىندا ءجۇرىپ، اققۋلى اۋدانىنداعى "قىزعالداق" بوبەكجاي-باقشاسىندا قاشىقتىقتان بۋحگالتەر بولىپ قىزمەت ەتكەن. بۇل جەردە دە 2023 جىلدىڭ جەلتوقسانى مەن 2024 جىلدىڭ مامىرى ارالىعىندا جالپى سوماسى 7 ميلليون تەڭگەدەن استام بيۋدجەت قاراجاتىن جىمقىرعان", - دەيدى ۆەدومستۆو.
پروكۋرور سوتتالۋشىنىڭ ەكەۋىنە دە 7 جىل مەرزىمگە باس بوستاندىعىنان ايىرۋ جازاسىن تاعايىنداۋدى سۇرادى. سوتتالۋشىلار كىنالارىن مويىنداپ، وكىنىپ، باس بوستاندىعىنان ايىرۋدان باسقا جازا تاعايىنداۋدى سۇرادى.
سوت شەشىمىمەن ەكەۋى دە 5 جىل مەرزىمگە مەملەكەتتىك ۇيىمداردا قارجىلىق جاۋاپكەرشىلىككە بايلانىستى لاۋازىمداردى اتقارۋ قۇقىعىنان ايىرىلدى جانە ارقايسىسىنا 7 جىل مەرزىمگە باس بوستاندىعىنان ايىرۋ تۇرىندەگى جازا تاعايىندادى.
ۇكىم زاڭدى كۇشىنە ءالى ەنگەن جوق.
