بۇرىنعى يندۋستريا جانە ينفراقۇرىلىمدىق دامۋ ۆيتسە-ءمينيسترى تيمۋر توقتاباەۆقا «اۋىر زارداپتارعا اكەپ سوقتىرعان لاۋازىمدىق وكىلەتتىكتەرىن اسىرا پايدالاندى» دەگەن ايىپ تاعىلدى. بۇل تۋرالى استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«سوتتالۋشى لاۋازىمدىق وكىلەتتىكتەرىن اسىرا پايدالانعانى ءۇشىن كىنالى دەپ تانىلىپ، 7 جىلعا باس بوستاندىعىنان ايىرىلدى. مۇلىك تاركىلەندى. ەندى ول ءومىر بويى مەملەكەتتىك قىزمەتتە جۇمىس ىستەي المايدى»،—دەدى سۋديا.
اۋدانارالىق سوتتىڭ ءباسپاسوز قىزمەتى توقتاباەۆتىڭ مينيسترلىك اتىنان ءوزى جەتەكشىلىك ەتەتىن اكتسيونەرلىك قوعاممەن قوستاناي وبلىسىنداعى كەن ورنىندا قاتتى پايدالى قازبالاردى بارلاۋعا كەلىسىمشارت جاساسقانىن مالىمدەدى. كەن ورنى مەملەكەتكە 40,6 ميلليارد تەڭگەدەن استام تابىس اكەلەدى دەپ كۇتىلگەن. كەلىسىمشارت ەنشىلەس كومپانياعا كەيىننەن جەر قويناۋىن پايدالانۋ قۇقىعىن زاڭسىز بەرۋدى كوزدەگەن.
تيمۋر توقتاباەۆتىڭ وسى جشس-دە سەنىمحات ارقىلى 20 پايىزدىق ۇلەسىنىڭ بولعانى انىقتالدى. كەيىن ۆيتسە-مينيستر ونى ءۇشىنشى تۇلعالارعا ساتىپ جىبەرگەن. ۇلەستىڭ 10 پايىزىن 425 ميلليون تەڭگەگە باعالانعان. وسى قىلمىستىق ارەكەتتەردىڭ سالدارىنان زاڭمەن رەتتەلەتىن مەملەكەتتىك ورگانداردىڭ قالىپتى قىزمەتى بۇزىلعان.
ەكس-ۆيتسە-مينيستر سوتتا ءوز كىناسىن مويىندامادى.
ۇكىم زاڭدى كۇشىنە ەنگەن جوق.
ەسكە سالا كەتەيىك، تيمۋر توقتاباەۆ بىلتىر 9 قاراشادا پايدالى كەن ورىندارىن زاڭسىز ۇلەستىردى دەگەن كۇدىكپەن ۇستالعان ەدى.
