تارازدا "كولىگىمدى ورتەدى" دەپ بىرنەشە شەنەۋنىكتى ايىپتاعان بلوگەر نۇرلان قاناتوۆ سوتتالدى. بۇل تۋرالى №2 قالالىق سوتى ايتتى، دەپ حابارلايدى «ادىرنا» ءتىلشىسى.
2022 جىلدىڭ قازانىندا سوتتالۋشى كولىگىنىڭ ورتەنگەن بەينەجازبالارىن Facebook الەۋمەتتىك جەلىسىنە تاراتقان.
وسىلايشا ول ءوزىن ساياسي جاعدايدىڭ قۇربانى دەگەن وي قالىپتاستىرعىسى كەلگەن. سوتتىڭ مالىمەتىنشە، كولىكتى ورتەۋگە بلوگەردىڭ ءوزى تاپسىرىس بەرگەن.
كەيىن ەر ادام بۇل ءىستى بىرنەشە شەنەۋنىك ۇيىمداستىردى دەگەن ايىپپىن جامبىل وبلىسىگىڭ پوليتسيا دەپارتامەنتىنە جۇگىنگەن.
بوتەننىڭ مۇلكىن قاساقانا جويۋ فاكتىسى بويىنشا ءىس قوزعالىپ، قىلمىس قۇرامى بولماۋىنا بايلانىستى ءىس قىسقارعان.
وسىلايشا قاناتوۆ قىلمىس جاسالعانى تۋرالى كورىنەۋ جالعان ءسوز جەتكىزگەن.
«سوتتالۋشىنىڭ كىناسى كۋالەردىڭ ايعاقتارىمەن، بەينەجازبالارمەن، ايعاق زاتتار ارقىلى دالەلدەندى. پروكۋرور سوتتالۋشىنى 5 جىل 4 ايعا باس بوستاندىعىنان ايىرۋدى سۇرادى. سوتتالۋشى ءوز كىناسىن مويىندامادى»،- دەپ جازدى سوتتىڭ ءباسپاسوز قىزمەتى.
ايىپتالۋشى سوت ۇكىمىمەن 3 جىل 6 اي مەرزىمگە باس بوستاندىعىنان ايىرىلدى. ۇكىم زاڭدى كۇشىنە ەنگەن جوق.
