شىعىس قازاقستان وبلىسى التاي قالاسىندا 31 جاستاعى بۋحگالتەر انگەلينا حون ءوز-وزىنە قول جۇمسادى. مارقۇمنىڭ تۋىستارى ونىڭ جۇمىسىندا قىسىم كورگەنىن جانە 3,5 ميلليون تەڭگەنىڭ جەتىسپەۋشىلىگى ءۇشىن ايىپتالعانىن ايتادى، دەپ حابارلايدى “ادىرنا” ۇلتتىق پورتالى.
قازىرگى تاڭدا ء“وزىن-ءوزى ولتىرۋگە يتەرمەلەۋ” بابى بويىنشا قىلمىستىق ءىس قوزعالىپ، تەرگەۋ باستالدى.
انگەلينانىڭ اناسى روزا حون قىزىنىڭ “دوستىق” مەيرامحاناسىندا جۇمىس ىستەگەنىن جانە سوڭعى ەكى ايدا قاتتى كۇيزەلىسكە تۇسكەنىن مالىمدەدى. ونىڭ ايتۋىنشا، قىزىنا باسشىلىق تاراپىنان قىسىم كورسەتىلگەن، ارىپتەستەرى دە وعان قارسى قويىلعان.
مارقۇمنىڭ تۋىستارى مەيرامحانانىڭ يەسى – كاسىپكەر مۇرات سايلاۋباەۆ پەن ونىڭ ايەلى ماديشا سايلاۋباەۆا جۇمىستى قيىنداتىپ، قىزمەتكەرلەرگە ۇلكەن جاۋاپكەرشىلىك جۇكتەگەنىن ايتادى. انگەلينا باستاپقىدا كاسسير بولىپ جۇمىس ىستەپ، كەيىن بۋحگالتەر رەتىندە اۋىستىرىلعان. 2024 جىلدىڭ قاراشا ايىندا مەكەمەدە تەكسەرۋ جۇرگىزىلىپ، 3,5 ميلليون تەڭگە جەتىسپەۋشىلىك انىقتالعان. وسىدان كەيىن باسشىلىق ونىڭ موينىنا قارىز ءىلىپ، مورالدىق قىسىم كورسەتكەنىن ايتادى.
اناسىنىڭ ايتۋىنشا، قىزى جۇمىستان كەتكىسى كەلگەنىمەن، “شىعا المايمىن، ويتكەنى ولار مەنى كىنالى دەپ ويلايدى” دەپ ايتقان. 27 قاڭتاردا، تۋعان كۇنىندە، باستىعى ونى جەكە كابينەتكە قاماپ، ايقايلاپ، كەمسىتكەن. وسى وقيعادان كەيىن انگەلينا ومىرىمەن قوشتاسۋعا شەشىم قابىلداعان.
ونىڭ سوڭعى حاتتارى تابىلىپ، ولاردا وتباسى مۇشەلەرىنەن كەشىرىم سۇراپ، ءوز ومىرىنە تۇسكەن اۋىرتپالىقتى كوتەرە الماعانىن جازعان. بۇرىنعى كۇيەۋىنە حات قالدىرىپ، ونى ءالى دە جاقسى كورەتىنىن مويىنداعان.
قازىرگى ۋاقىتتا شقو پوليتسيا دەپارتامەنتى بۇل ءىس بويىنشا تەرگەۋ جۇرگىزىپ جاتىر. تۋىستارى ادىلدىك تالاپ ەتىپ، كىنالىلەردىڭ جاۋاپقا تارتىلۋىن سۇرايدى. ال كاسىپكەر مۇرات سايلاۋباەۆ پەن ونىڭ ايەلى بۇل وقيعاعا قاتىستى رەسمي تۇسىنىكتەمە بەرمەگەن. جۋرناليستەر دە بايلانىسقا شىققانىمەن، ەشقانداي جاۋاپ الا الماعان.
مارقۇمنىڭ جاقىندارى “انگەلينانىڭ اتىنا كىر كەلتىرمەۋ جانە ءادىل تەرگەۋ جۇرگىزۋ” ءۇشىن كۇرەسەتىنىن مالىمدەدى.
