Pavlodarda bıýdjet qarajatyn jymqyrǵan býhgalter sottaldy. Bul týraly oblystyq sot málimdedi, dep habarlaıdy “Adyrna” ulttyq portaly.
Aqparatqa sáıkes, 2022 jyldyń qańtarynan bastap 2024 jyldyń naýryzyna deıin Pavlodar qalasyndaǵy № 4 bóbekjaı-baqshasynyń býhgalteri sharýashylyq meńgerýshisimen sóz baılasyp, eseptik-tóleý týraly tizimdi zańsyz jasaǵan. Ekeýi shottaryna zańsyz aqsha aýdaryp, memleketke jalpy somasy 41 mıllıon teńgeden astam materıaldyq zalal keltirgen.
Odan bólek, osyǵan uqsas qylmystyq shemany paıdalanyp, B.A. 2023 jyldyń qyrkúıegi men 2024 jyldyń mamyry aralyǵynda "Pavlodar qalasynyń №7 bóbekjaı-baqshasy" MQKK-nyń býhgalteri bolyp qyzmet atqaryp, jalpy somasy 5 mıllıon teńgeden astam bıýdjet qarajatyn jymqyrǵan.
"Sondaı-aq býhgalter Pavlodar qalasynda júrip, Aqqýly aýdanyndaǵy "Qyzǵaldaq" bóbekjaı-baqshasynda qashyqtyqtan býhgalter bolyp qyzmet etken. Bul jerde de 2023 jyldyń jeltoqsany men 2024 jyldyń mamyry aralyǵynda jalpy somasy 7 mıllıon teńgeden astam bıýdjet qarajatyn jymqyrǵan", - deıdi vedomstvo.
Prokýror sottalýshynyń ekeýine de 7 jyl merzimge bas bostandyǵynan aıyrý jazasyn taǵaıyndaýdy surady. Sottalýshylar kinálaryn moıyndap, ókinip, bas bostandyǵynan aıyrýdan basqa jaza taǵaıyndaýdy surady.
Sot sheshimimen ekeýi de 5 jyl merzimge memlekettik uıymdarda qarjylyq jaýapkershilikke baılanysty laýazymdardy atqarý quqyǵynan aıyryldy jáne árqaısysyna 7 jyl merzimge bas bostandyǵynan aıyrý túrindegi jaza taǵaıyndady.
Úkim zańdy kúshine áli engen joq.
