جاپونيادا ەلدىڭ بۇرىنعى پرەمەر-ءمينيسترى سيندزو ابەنى ءولتىردى دەپ ايىپتالعان ازاماتقا ۇكىم شىقتى، دەپ حابارلايدى «ادىرنا» ءتىلشىسى.
ەر ادام نارا قالاسىنىڭ اۋداندىق سوتىندا ءوز كىناسىن مويىندادى. پروكۋراتۋرا ايىپتالۋشىنى ءومىر بويىنا باس بوستاندىعىنان ايىرۋدى تالاپ ەتىپ، بۇل قىلمىستى «جاپونيانىڭ سوعىستان كەيىنگى تاريحىنداعى بۇرىن-سوڭدى بولماعان وقيعا» دەپ اتادى. ال قورعاۋشىلار ياماگاميگە 20 جىلدان اسپايتىن جازا تاعايىنداۋدى سۇراپ، ونىڭ «دىنگە بايلانىستى زورلىق-زومبىلىقتىڭ قۇربانىنا» اينالعانىن جانە تۇزەلۋگە مۇمكىندىك بەرۋگە لايىق ەكەنىن العا تارتتى.
الايدا ايىپتاۋشى تاراپ بۇل دالەلدەردىڭ قيسىنىز ەكەنىن، قىلمىسكەر قىلمىستى 41 جاسىندا، ياعني جاعدايدى تولىق باعامداي الاتىن كەزدە جاساعانىن مالىمدەگەن.
ەسكە سالايىق، سيندزو ابەنى 2022 جىلدىڭ شىلدە ايىندا كوپشىلىك الدىندا سويلەپ تۇرعان كەزىندە اتىپ كەتكەن ەدى. ول بىرنەشە ساعاتتان كەيىن اۋرۋحانادا كوز جۇمعان بولاتىن.
كۇدىكتى تەتسۋيا ياماگامي قىلمىس ورنىندا ۇستالعان. ول ءوز ارەكەتىن بىرىگۋ شىركەۋىنە دەگەن وشپەندىلىگىمەن تۇسىندىرگەن. ايتۋىنشا، اكەسى قايتىس بولىپ، اعاسىنىڭ اۋىر حالگە تۇسۋىنەن سوڭ اناسى وتباسىن ساقتاپ قالۋ ءۇشىن وسى ۇيىمعا قوماقتى قارجى اۋدارعان. ياماگامي باستاپقىدا شىركەۋ وكىلىنە شابۋىل جاساۋدى جوسپارلاعان، الايدا كەيىن بۇل ۇيىممەن «تىعىز بايلانىسى بار جانە ونىڭ يدەيالارىن جاپونيادا ناسيحاتتادى» دەپ ەسەپتەپ سيندزو ابەنى نىساناعا العان.
