"مەدياماگنات" ارمانجان بايتاسوۆ الماتىدا جوعارى لاۋازىمدى شەنەۋنىكتەردىڭ جەردى زاڭسىز يەمدەنۋ فاكتىسى بويىنشا قوزعالعان قىلمىستىق ءىس بويىنشا تەرگەلۋدە. بۇل تۋرالى اقپارات كوزاچكوۆ Telegram ارناسىندا جاريالاندى، دەپ حابارلايدى “ادىرنا” ۇلتتىق پورتالى.
"الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سوت پروتسەسى باستالدى. ايىپتاۋشىلار قاتارىندا بۇرىنعى باسقارما باسشىسى الماسحان احمەدجانوۆ پەن اكىمدىكتەگى جەر ماسەلەسىنە جاۋاپتى ارداق سامامبەتوۆ باستاعان جەرگە جانە قۇرىلىسقا رۇقسات بەرۋگە قاتىستى ءبىر توپ شەنەۋنىك بار. بۇل ءىس مەملەكەتتىك قىزمەتشىلەرگە عانا ەمەس، الماتىنىڭ دەپۋتاتتارى مەن ءىرى بيزنەسمەندەرگە دە قاتىستى ءىس", – دەلىنگەن اقپاراتتا.
اقپاراتقا سايكەس، ىستەردىڭ بىرىنە ارمانجان بايتاسوۆتىڭ دا قاتىسى بار كورىنەدى.
"كۇتپەگەن جەردەن قۇرىلىسقا بىرنەشە باق يەسىنىڭ دە قاتىسى بار ەكەنى بەلگىلى بولدى. ونىڭ قاتارىندا "ارت-مەديا كورپوراتسياسى" جشس يەلىگىندەگى "تان مەديا گرۋپپ" جشس بار. بۇل الماتىنىڭ ورتالىعىنداعى "River Park" تۇرعىن ءۇي كەشەنىن سالۋشى كومپانيا. وتكەن جىلى قىس مەزگىلىندە بۇل تۇرعىن ءۇي كەشەنىنىڭ تۇرعىندارى پاتەرلەردە جىلۋ جۇيەسى جۇمىس ىستەمەيتىنىنە شاعىمدانىپ، شۋ شىعارعان. انتيكوردىڭ حابارلاۋىنشا بۇل كەشەن زاڭسىز سالىنعان. ال بۇل اۋماقتا ءۇي سالۋعا بولمايتىنىن بىلە تۇرا قۇجاتتاردى بۇرمالاپ، قۇرىلىسقا رۇقسات بەرگەن. الماسحان احمەدجانوۆتىڭ كۇيەۋ بالاسى بۇل تۇرعىن ءۇي كەشەنىنەن جىلجىمايتىن مۇلىككە يە بولىپ، مۇلىكتى لايىقتى جەڭىلدىكپەن ساتىپ العان. پاتەر 30 ميلليون تەڭگەدەن اسادى، بىراق ساتىپ الۋشى ونى 9 ميلليون تەڭگەگە العان", – دەلىنگەن اقپاراتتا.
سونداي-اق، احمەدجانوۆقا قىزمەتتىك وكىلەتتىگىن اسىرا پايدالاندى دەگەن ايىپ تاعىلعان.
“شەنەۋنىكتەر جەكە تۇرعىن ءۇي سالۋعا ارنالعان اۋماققا تۇرعىن ءۇي كەشەندەرىن سالۋعا رۇقسات بەرگەن. مىسالى، احمەدجانوۆپەن كەلىسىمگە كەلىپ زاڭسىز اركەت جاساعانداردىڭ ءبىرى بوريس چەن. چەن قازىر ەكى تۇرعىن ءۇي كەشەنىن سالۋ كەزىندە اقشا جىمقىرعانى ءۇشىن جازاسىن وتەپ جاتىر. ول قالا قۇرىلىسى ءبولىمىنىڭ باسشىسىن ەكى جەر تەلىمىنە بىرنەشە ءۇي سالۋعا رۇقسات بەكىتۋگە كوندىرگەن. ونىڭ ءبىرى – جەكە تۇرعىن ءۇي قۇرىلىسى بولسا، ەكىنشىسى – جالپى شارۋا قوجالىعى. مەملەكەتكە كەلتىرىلگەن شىعىن 150 ميلليون تەڭگەدەن اسقان”، – دەپ اتاپ ءوتتى جۋرناليست.
ەسكە سالساق، بۇعان دەيىن سىبايلاس جەمقورلىققا قارسى قىزمەت شەنەۋنىك جەر تەلىمدەرىن بەرۋ جانە نىسانداردىڭ قۇرىلىسىنا رۇقسات بەرۋ كەزىندە قىزمەتتىك وكىلەتتىكتەرىن اسىرا پايدالاندى دەگەن كۇدىككە ىلىنگەنىن حابارلادى.
