اقمولا وبلىسى پد ۇيىمداسقان قىلمىسقا قارسى كۇرەس باسقارماسى «Qarmet» اق كاسىپورنى اۋماعىنان ۇزاق ۋاقىت بويى جانار-جاعارماي ماتەريالدارىن ۇرلاۋمەن اينالىسقان قىلمىستىق توپتى ۇستادى. بۇل تۋرالى بۇگىن، 25 شىلدەدە ىشكى ىستەر مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
جابىرلەنۋشى تاراپتىڭ مالىمەتىنشە، كاسىپورىنعا 50 ملن تەڭگەدەن استام شىعىن كەلتىرىلگەن.
«Qarmet» اق قاۋىپسىزدىك قىزمەتىمەن بىرلەسىپ، كاسىپورىن قىزمەتكەرلەرىنىڭ، ونىڭ ىشىندە كۇزەت قىزمەتىنىڭ جانار-جاعارماي جىمقىرۋعا قاتىسى بار-جوعى تەكسەرىلۋدە. ءتىنتۋ ءىس-شارالارى بارىسىندا ۇستالعانداردان 5,5 تونناعا جۋىق ديزەل وتىنى، ءىرى كولەمدە قاراجات جانە ءىس بويىنشا وزگە دە زاتتاي دالەلدەمەلەر تاركىلەندى. بارلىق كۇدىكتى ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ جۇرگىزىلىپ جاتىر»،—دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
ەسكە سالايىق، بۇعان دەيىن ىشكى ىستەر مينيسترلىگى «Qarmet» اق-دان اسا ءىرى مولشەردە ۇرلىق جاسادى دەگەن كۇدىكپەن قىلمىستىق توپتىڭ ەكى مۇشەسىنە ىزدەۋ سالعان ەدى.
