نۋمەرولوگ يرينا ءابدىرايىموۆا تامىز ايى شىلدەگە قاراعاندا جاقسى كۇندەرگە تولى بولاتىنىن ايتادى. وسى ورايدا ول ءومىر سىيلاعان مۇمكىندىكتەردى جىبەرىپ الماعان ءجون ەكەنىن ەسكەرتتى، دەپ حابارلايدى"adyrna.kz"  Sputnik قازاقستان اقپارات اگەنتتىگىنە سىلتەمە جاساپ.

جۇلدىزدار سىرىن ۇققان مامان سوڭعى بولجامدارىندا جاعىمسىز جاڭالىقتار كوپ بولعانىن ايتادى. بۇل وزگەلەردىڭ عانا ەمەس، ءوزىنىڭ دە كوڭىلىن تۇسىرگەن ەكەن. دەسە دە، ول تامىز ايىندا كەرىسىنشە جاعىمدى ساتتەردىڭ كوبىرەك بولاتىنىن ايتىپ قۋانتتى.

"اي باسىندا ءبىزدىڭ بەلسەندىلىگىمىز ارتىپ، الدىمىزعا قويعان ماقساتتارعا اسقان تاباندىلىقپەن جەتەمىز. ەڭ باستىسى، ءبىزدىڭ جۇمىس ىستەۋ قابىلەتىمىز جاقسارادى. وزگەلەرگە كومەك قولىن سوزۋ ارقىلى باقىتقا بولەنەمىز، وزىمىزگە بەرەتىن باعامىز دا جوعارىلايدى", - دەدى نۋمەرولوگ.

مامان ادىلدىك ورناتۋ ءۇشىن ۇلكەن ىسكە كىرىسۋدەن ەش قورىقپاۋعا كەڭەس بەرەدى. اسىرەسە، ءبىزدى ءبىلىم، ۇستازدىق جانە ساياسات سالاسىندا تابىس كۇتىپ تۇر. سونداي-اق، بيرجاداعى وپەراتسيالار ءساتتى وتەدى.

ادامدار شەكتەن تىس سەزىمتال بولىپ كەتەدى

ءارى قاراي يرينا ءابدىرايىموۆا كوپ ادامنىڭ قۇمار ويىندارىندا جولى بولعانمەن، بارلىق نارسەدە بالانس ساقتالۋى كەرەكتىگىن ەسكەرتتى. ايتۋىنشا، تامىز ايىنىڭ العاشقى توقسانىندا ادامدار شەكتەن تىس سەزىمتال بولىپ كەتەدى. اينالامىزداعىلاردىڭ ءسوزدى قالاي ايتقانىنا دەيىن ءمان بەرەتىن جاعدايعا جەتەمىز. شىندىقتى ايتىپ تۇرعان جانە الداپ تۇرعان ادامنىڭ ارا-جىگىن بىردەن اجىراتامىز.

"اقپاراتتى قۇلاعىمىز، كوزىمىزبەن ەمەس، تۇيسىگىمىزبەن قابىلدايمىز. ۋاقىت وتە كەلە، ادامنىڭ بىزگە ايتقىسى كەلگەن ءسوزىن الدىن الا بولجايمىز. مۇمكىندىگىنشە قيالىمىزعا قانداي دا ءبىر شەكتەۋ قويىپ وتىرعانىمىز ءجون", - دەيدى يرينا ءابدىرايىموۆا..

سونداي-اق، ونىڭ پىكىرىنشە، ەگەر قارسى الدىڭىزداعى ادامنىڭ جۇرەگىن جاۋلاعىڭىز كەلسە، اڭگىمەنى ونىڭ پروبلەمالارىن سۇراۋدان باستاۋ كەرەك. اسىرەسە، وتباسى مەن جۇمىسىنا قاتىستى سۇراقتاردى كوبىرەك قويىڭىز. ال ساياحاتتايتىن بولساڭىز، جالعىز جۇرمەگەنىڭىز ءجون.

6, 7, 8 تامىز – جۇمىس ءۇشىن تابىستى كۇندەر بولماق. اسىرەسە، باسشىلىقپەن، بيلىكپەن قانداي دا ءبىر كەلىسسوز جۇرگىزۋگە ءتيىمدى. 12 تامىزدان باستاپ ءبىزدىڭ ساياسي جاڭالىقتارعا دا، وسەككە دە قىزىعۋشىلىعىمىز شەكتەن تىس ارتا باستايدى. كەيىن وسى ەستىگەندەرىمىزدى اينالامىزداعىلارعا جەتكىزۋگە تىرىسامىز. اراسىندا ءوز تاراپىمىزدان دەتال قوسىپ جىبەرەتىن كەزدەر دە كەزدەسەدى.

اي ورتاسىندا كوڭىلىڭىزدى تۇسىرەتىن جاڭالىق ەستيسىز

نۋمەرولوگتىڭ بولجاۋىنشا، تامىز ايىنىڭ ەكىنشى توقسانىنان باستاپ الىس-جاققان جەرلەرگە تەك كوڭىل كوتەرۋ ءۇشىن باراسىز. كوپشىلىكتىڭ الدىندا ءوزىڭىزدىڭ قانشالىقتى ءبىلىمدى ەكەنىڭىزدى كورسەتىپ قالۋعا تىرىساسىز.

"ەگەر ءوزىڭىزدى قانداي دا ءبىر ماقساتتا جارنامالاۋدى كوپتەن بەرى قالاپ جۇرگەن بولساڭىز، بۇل مۇمكىندىكتى جىبەرىپ الماڭىز. جالپى تامىز ايىنىڭ العاشقى ەكى بولىگىندە ءوزىمىزدى جەر-كوككە سىيعىزباي ماقتاعان جاندارعا بۇيرەگىمىز بۇرىپ تۇرادى. وسى ورايدا وزگەلەرگە دە جۇرەكتى جىلىتار قوشەمەت ءسوز ايتۋدى ۇمىتپاعان ءجون", - دەيدى مامان.

جازدىڭ سوڭعى ايىندا ادامداردىڭ رومانتيكاعا دەگەن قۇلشىنىسى ارتادى. قىمبات ءارى ءساندى كيىنۋگە قۇمارتىپ، دۇكەننەن كوپتەگەن ادەمى زات ساتىپ الاسىز. كەزدەسۋ ءبىر رەتتىك بولسا دا، اسەرى ماڭگىلىككە قالاتىنى ءسوزسىز. ءارتۇرلى كوسمەتيكالىق پروتسەدۋرا جاساتۋ ءۇشىن دە قولايلى ۋاقىت بولماق. تەك ءبىر ەسكەرەتىنى – 15, 16 تامىز كۇندەرى كوڭىلدى تۇسىرەتىن جاڭالىق ەستۋىڭىز مۇمكىن. وسى جاڭالىققا بولا اشۋعا بوي الدىرىپ، كۇتپەگەن جەردەن جانجال شىعاراسىز. تۇيمەدەيدى تۇيەدەي ەتىپ، تەرىس شەشىم قابىلدايسىز. سونداي-اق، جۇمىستا قيىندىقتار بولىپ، جالعان اقپارات ەستۋىڭىز مۇمكىن. سول سەبەپتى وسى كۇندەرى اسا ساق بولىڭىز.

"ايدىڭ ورتاسىندا ەلەكتر قۇرىلعىلارىن ابايلاپ پايدالانىڭىز. مۇمكىندىگىنشە اۋە كولىگىن قولدانباي قويا تۇرعانىڭىز ءجون. بۇل قوزىپ تۇرعان جۇيكە اۋرۋىن اسقىندىرادى. 18 تامىزدان كەيىن "دەمالعان جاقسى، بىراق جۇمىس ىستەۋ" كەرەك دەگەن وي تۋادى. اقىرىنداپ ءبارىن رەتكە كەلتىرىپ، ويىڭىزدى جيناقتاي باستايسىز", - دەدى نۋمەرولوگ.

ال 20-21 تامىز زاڭگەرلەردىڭ كومەگىنە جۇگىنىپ، وتباسىن قۇرۋ ءۇشىن تاپتىرماس كۇن بولماق. 22 تامىزدان باستاپ رومانتيكانى شەتكە ىسىرىپ، جۇرەك ەمەس، اقىلدى تىڭداي باستايسىز.

اي سوڭىندا ەڭبەگىڭىز كوپ اقشا اكەلەدى

سونىمەن قاتار، ول وڭدى-سولدى اقشا شاشۋعا دەگەن قۇلشىنىستى سانالى شەشىمدەر الماستىراتىنىن ايتتى. 24 تامىزدان باستاپ جۇمىسقا بىلەك سىبانا كىرىسەمىز. الايدا 25 تامىزدا جىنىستىق قاتىناسقا دەگەن ەرەكشە قۇلشىنىس وياناتىندىقتان، ادامدار سۇيىكتىسىن ساعىنا باستايدى. ءتىپتى، 26 تامىز كۇنى قىز-كەلىنشەكتەر تۇرمىسقا شىعۋعا ۇسىنىس الۋى دا عاجاپ ەمەس. 25-26 تامىز كۇندەرى تانىسقان ادامدارىڭىز ماڭگىلىك سەرىگىڭىزگە اينالادى.

"29-30 تامىز كۇندەرى ەڭبەگىڭىز جەمىستى بولىپ، قالتاڭىز قالىڭداي تۇسەدى. جولىڭىز بولىپ، كوكەيىڭىزدە جۇرگەن ارمانىڭىز ورىندالادى. 31 تامىز كۇنى مۇمكىندىگىنشە ءسوز تالاستىرىپ، ۇرىسۋدان بويىڭىزدى اۋلاق ۇستاڭىز. ايتپەسە جامان سالدارى سىزگە ءتيۋى مۇمكىن", - دەدى ول.

ەڭ قۋانتاتىنى – وسى ايدا عاشىقتار اراسىندا تۇتانعان سەزىم وتى ماڭگىلىككە ۇلاسادى. سونداي-اق، جاسى ۇلكەن اعايىن-تۋىستارىڭىز قارجىلاي كومەك قولىن سوزادى.