ماڭعىستاۋ وبلىسىنداعى مۇعالىمدەرگە جازداعى دەمالىسى ءۇشىن تولەنۋگە ءتيىس بيۋدجەت قارجىسى ءالى كۇنگە دەيىن بولىنبەگەن. وسى وبلىستىڭ ۇستازدارىنىڭ باسىم بولىگى دەمالىسىن اقشاسىز وتكىزگەن. مۇعالىمدەردىڭ دەمالىسى ءۇشىن تولەنۋگە ءتيىس قارىز قارجى سوماسى ءبىر ميللياردقا جۋىق. بۇل تۋرالى اقپارات تاراتقان قازتاگ اگەنتتىگى ايماقتاعى ءبىلىم باسقارماسىنان «ماۋسىم ايىندا دەمالعان مۇعالىمدەردىڭ ايلىعى مەن دەمالىس اقشاسى تۇگەل تولەندى. بۇگىن دە 80 پايىز ۇستاز شىلدە ايىنىڭ جالاقىسىن الدى. بۇعان دەيىن ۇستازدارعا قارىزىمىز – 6,5 ملرد تەڭگە بولاتىن. قازىر 1 ملرد تەڭگە قارىزىمىز عانا قالدى. تولەم جاساۋدى الداعى بىرەر كۇندە بىتىرەمىز» دەگەن جاۋاپ العانىن حابارلادى.
ال وسى وبلىستىڭ بىرقاتار مۇعالىمدەرى بۇگىنگە دەيىن ءبىر تيىن اقشا الماعاندارىن، بۇكىل دەمالىسىن اقشاسىز وتكىزگەنىن ايتادى.
«ءبىز اقشامىزدىڭ ءبىر عانا بولىگىن الدىق. ءوزىم ماۋسىم ايىندا دەمالىسقا شىقتىم. ءالى دەمالىس اقشامنان تولەنبەگەن 150 مىڭ تەڭگەمدى العانىم جوق. مەكتەپ باسشىسى بۇل جاعدايعا بايلانىستى ناقتى تۇسىنىك بەرمەي وتىر. رەسپۋبليكالىق بيۋدجەتتەن تۇسۋگە ءتيىس اقشانى كۇتىپ وتىرعاندارىن ايتادى. بۇل دەگەن مازاق قوي! دەمالىسقا شىققانمەن قالتادا كوك تيىن جوق. اقشانىڭ جوقتىعىنان ساناتوريگە دە دەمالۋعا بارا المادىم. انە-مىنە دەگەنشە، دەمالىسىمىز دا ءبىتتى. الدا جاڭا وقۋ جىلى باستالادى. ءبىزدىڭ بۇل ماسەلەمىزگە ەشكىم باسىن اۋىرتقىسى كەلمەيتىن سياقتى»، – دەپ شاعىمداندى ماڭعىستاۋلىق ۇستازداردىڭ ءبىرى.
تەك ماڭعىستاۋ ءوڭىرى ەمەس، ەلىمىزدىڭ بىرنەشە وبلىسىنداعى ۇستازدار بيىل دەمالىس اقشاسىن كەشىكتىرىپ الدى. ءتىپتى، وسى كۇنگە دەيىن جالاقىسىن تۇگەل الماعان دا ۇستازدار جوق ەمەس. مۇعالىمدەر وسى ءۇش ايلىق دەمالىستارىن توعىز اي بويى ەرەكشە كۇتەدى. مىندەتتى تۇردە وسى دەمالىسقا كوپ جوسپار تۇزەدى. ءبىرى ۇيىنە جوندەۋ جۇمىسىن جاساۋدى، ەندى ءبىرى قىدىرۋدى، ەمدەلۋدى، قۇدا كۇتىپ، توي جاساۋدى جوسپارلاۋى مۇمكىن. وكىنىشكە قاراي، بيۋدجەت ءبۇيىرىنىڭ تەسىلۋى مەن ءتيىستى قارجىنىڭ ۋاقىتىلى تۇسپەۋى قازاقستاندىق ۇستازداردىڭ جوسپارىن بۇزدى. ۇستازدار نەگە ايلىقسىز قالدى؟ بۇل سۇراققا ءتيىستى مەكەمە تاراپىنان ناقتى جاۋاپ بولادى دەگەن سەنىمدەمىز.
مەرۋەرت كەڭەسبەكقىزى
"ادىرنا" ۇلتتىق پورتالى
