Qazaqstandyq ustazdar demalysyn ne sebepti aqshasyz ótkizdi?

526

Mańǵystaý oblysyndaǵy muǵalimderge jazdaǵy demalysy úshin tólenýge tıis bıýdjet qarjysy áli kúnge deıin bólinbegen. Osy oblystyń ustazdarynyń basym bóligi demalysyn aqshasyz ótkizgen. Muǵalimderdiń demalysy úshin tólenýge tıis qaryz qarjy somasy bir mıllıardqa jýyq. Bul týraly aqparat taratqan QazTAG agenttigi aımaqtaǵy bilim basqarmasynan «Maýsym aıynda demalǵan muǵalimderdiń aılyǵy men demalys aqshasy túgel tólendi. Búgin de 80 paıyz ustaz shilde aıynyń jalaqysyn aldy. Buǵan deıin ustazdarǵa qaryzymyz – 6,5 mlrd teńge bolatyn. Qazir 1 mlrd teńge qaryzymyz ǵana qaldy. Tólem jasaýdy aldaǵy birer kúnde bitiremiz» degen jaýap alǵanyn habarlady.

Al osy oblystyń birqatar muǵalimderi búginge deıin bir tıyn aqsha almaǵandaryn, búkil demalysyn aqshasyz ótkizgenin aıtady.

«Biz aqshamyzdyń bir ǵana bóligin aldyq. Ózim maýsym aıynda demalysqa shyqtym. Áli demalys aqshamnan tólenbegen 150 myń teńgemdi alǵanym joq. Mektep basshysy bul jaǵdaıǵa baılanysty naqty túsinik bermeı otyr. Respýblıkalyq bıýdjetten túsýge tıis aqshany kútip otyrǵandaryn aıtady. Bul degen mazaq qoı! Demalysqa shyqqanmen qaltada kók tıyn joq. Aqshanyń joqtyǵynan sanatorııge de demalýǵa bara almadym. Áne-mine degenshe, demalysymyz da bitti. Alda jańa oqý jyly bastalady. Bizdiń bul máselemizge eshkim basyn aýyrtqysy kelmeıtin sııaqty», – dep shaǵymdandy mańǵystaýlyq ustazdardyń biri.

Tek Mańǵystaý óńiri emes, elimizdiń birneshe oblysyndaǵy ustazdar bıyl demalys aqshasyn keshiktirip aldy. Tipti, osy kúnge deıin jalaqysyn túgel almaǵan da ustazdar joq emes. Muǵalimder osy úsh aılyq demalystaryn toǵyz aı boıy erekshe kútedi. Mindetti túrde osy demalysqa kóp jospar túzedi. Biri úıine jóndeý jumysyn jasaýdy, endi biri qydyrýdy, emdelýdi, quda kútip, toı jasaýdy josparlaýy múmkin. Ókinishke qaraı, bıýdjet búıiriniń tesilýi men tıisti qarjynyń ýaqytyly túspeýi qazaqstandyq ustazdardyń josparyn buzdy. Ustazdar nege aılyqsyz qaldy? Bul suraqqa tıisti mekeme tarapynan naqty jaýap bolady degen senimdemiz.

 

Merýert KEŃESBEKQYZY

"Adyrna" ulttyq portaly

Pikirler