استانا ماڭىندا مالدىڭ تەرىلەرى مەن ىشەك-قارنى شاشىلىپ جاتىر. بۇل تۋراليا قازاقستاننىڭ ورگانيكالىق ءونىم وندىرۋشىلەر وداعىنىڭ ديرەكتورى ارسەن كەرىمبەكوۆ جەلىدەگى پاراقشاسىندا جازىپ، فوتو جاريالادى، دەپ حابارلايدى “ادىرنا” ۇلتتىق پورتالى.
«نەگە بىزدە كوپ ەلگە قاراعاندا ەت باعاسى سولارمەن بىردەي، كوبىنە ءتىپتى قىمبات؟ سەبەبى وسى جىلدار بويى مالدى ەت كومبيناتتارىنا وتكىزۋ جۇمىسىن رەتتەي المادىق. باعدارلامالار، سۋبسيديالار – مۇنىڭ ءبارى بوس ءسوز. مىنا فوتولار كەشە تۇسىرىلگەن. استانا قاساپحاناسىنىڭ ماڭىندا تەرى، ىشەك-قارىن مەن ۇيىعان قان جايراپ جاتىر. ال ونىڭ ءيىسى قانداي بولاتىنىن ەلەستەتىپ كورىڭىزدەر!»، - دەپ جازدى كەرىمبەكوۆ جەلىدەگى پاراقشاسىندا.
وسى پوستان كەيىن اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتىنىڭ استانا قالاسى اۋماقتىق ينسپەكتسياسى پوليتسەيلەرمەن بىرگە كورسەتىلگەن مەكەنجايعا بارعان.
«تەكسەرىس بارىسىندا الاش شوسسەسى، 313 كوشەسىندە، «اگرو ءونىم استانا» جشس مال سويۋ پۋنكتىنە ىرگەلەس اۋماقتا مالدىڭ ىشەك-قارنى تابىلدى. مال سوياتىن پۋنكت قۇرىلىس جۇمىستارىنا بايلانىستى 2023 جىلى قىزمەتىن توقتاتقان. الايدا قۇربان ايت كەزىندە ۋاقىتشا مال سويىلعان»، - دەلىنگەن حابارلامادا.
وسى فاكتىگە بايلانىستى «اگرو ءونىم استانا» جشس مال سويۋ پۋنكتىنىڭ يەسى ج.جايلاۋعا اكىمشىلىك حاتتاما تولتىرىلىپ، 30 اەك، ياعني، 110 760 تەڭگە ايىپپۇل سالىندى. اۋماق تازارتىلدى.
سونداي-اق الاش شوسسەسى كوشەسىنەن قۇرىلىس قوقىسى مەن مالدىڭ ىشەك-قارنى شاشىلعان تاعى ءبىر جەر ۋچاسكەسى تابىلعان. جەردى جالعا العان ا.س.مادەنوۆكە اكىمشىلىك حاتتاما تولتىرىلدى. جەر ۋچاسكەسى تازارتىلدى.
