بوكسشى باقتيار ارتاەۆ قازاقستان بوكس فەدەراتسياسىنىڭ ۆيتسە-پرەزيدەنتى جانە مەملەكەتتىك باپكەر قىزمەتىنەن نەگە كەتتى؟ بۇل تۋرالى ول "ۋاقىت كورسەتەدى" YouTube-ارناسىندا ايتىپ بەردى، دەپ حابارلايدى “ادىرنا” ۇلتتىق پورتالى.
سۇحبات بارىسىندا سپورتشى ءوزىنىڭ قىزمەتىنەن كەتۋىنىڭ بىرنەشە سەبەبىن اتادى.
ءبىرىنشىسى – سول كەزدەگى مادەنيەت جانە سپورت ءمينيسترى اقتوتى رايىمقۇلوۆانىڭ ورنىن باسادى دەپ قورىققاندار بولعان كورىنەدى. ال، ەكىنشى سەبەبى – بوكسشىنىڭ "قاڭتار" وقيعاسىنا قاتىسى بار دەگەن كۇدىكپەن ۇستالعان "ديكي ارماندى" قولداپ جازبا جازۋى.
“كىم كىممەن ارالاسپاي جاتىر؟ تازا اقىماقتىق. اشىعىن ايتايىق، تۇنگى ساعات ەكىدە كاليان شەگىپ وتىرىپ، سول كەزدەگى سپورت كوميتەتىنىڭ باسشىسى حابارلاستى. "ديكي ارمانمەن" ارالاسادى ەكەنسىڭ، جۇمىستى بوساتۋىڭ كەرەك" دەپ ايتتى. ايلىعىم 180 مىڭ تەڭگە بولدى. شەتەلدە مەن سياقتى ماماندى 10 مىڭ دوللار تولەپ شاقىرار ەدى. "توكيودان جىلاپ كەلدىڭدەر. ۇلتتىق وليمپيادا كوميتەتى مەن مينيسترلىك كىنانى ءبىر-بىرىنە جاۋىپ سىلتەدىڭدەر. التىن جوق. اراعا 2 ساي كەلىپ، سەربياداعى الەم بىرىنشىلىگىنەن ەكى التىن الىپ بەردىم. سوندا 180 مىڭ تولەپ، وسىنىڭ ءوزىن ارتىق كورىپ كەتتىڭدەر مە؟" دەدىم. مەيلى دەپ، ترۋبكانى قويىپ، ارىزىمدى جازىپ بەردىم”، - دەيدى باقتيار ارتاەۆ.
بوكسشىعا حابارلاسقان – سول كەزدەگى سپورت جانە دەنە شىنىقتىرۋ ىستەرى كوميتەتىن باسقارعان سامات ەرعاليەۆ. ول قازىر بيۋدجەت قارجىسىن جىمقىردى دەگەن كۇدىكپەن ۋاقىتشا ۇستاۋ يزولياتورىندا جاتىر.
“اللا شەبەر. ءوزى ماڭگى سول جەردە وتىراتىنداي ويلادى. ەندى قازىر ءوزى قايدا وتىرعانىن بىلەسىزدەر”، - دەيدى سپورتشى.
ەسكە سالساق، باقتيار ارتاەۆ 2022 جىلى اقپاندا بوكس فەدەراتسياسىنىڭ ۆيتسە-پرەزيدەنتى قىزمەتىنەن كەتكەن بولاتىن.
2022 جىلعى اقپاندا باقتيار ارتاەۆ "ديكي ارمان" رەتىندە تانىمال قىلمىس الەمىنىڭ سەركەسى ارمان جۇماگەلديەۆكە ارناپ پوست جازدى. ول "باۋىرى ءۇشىن جۇرەگى اۋىراتىنىن" ايتىپ، بوساتۋدى سۇراعان ەدى.
ارمان جۇماگەلديەۆ "قاڭتار وقيعاسىنا" قاتىستى ەكى جارىم جىلدان بەرى تەرگەۋ يزولياتورىندا جاتىر.
