جەتىسۋ وبلىسى پوليتسيا دەپارتامەنتىنىڭ بۇرىنعى باستىعى، پوليتسيا گەنەرال-مايورى سەرىك كۇدەباەۆتىڭ قورعاۋشىلارى سوتقا ءوتىنىش جولداعان ەدى. ولار ءوز وتىنىشىندە سوت ءىسىن توقتاتىپ، كۇدەباەۆتى قايتا قىزمەتىنە تاعايىنداۋدى سۇراپ وتىر. سونىمەن قاتار، الەۋمەتتىك جەلىدە سەرىك كۇدەباەۆتىڭ ءوز قىزمەت ورنىن قالاي تاستاپ قاشقانىن ايعاقتايتىڭ ۆيدەوجازبا تارادى. قوعام بەلسەندىسى وراز الىمبەكوۆ تە كۇدەباەۆتىڭ قاڭتار قارساڭىنداعى قىزمەتىنە قاتىستى جەكە پىكىرىن ءبىلدىردى، دەپ حابارلايدى "ادىرنا" ۇلتتىق پورتالى.
"قاڭتار: گەنەرال كۇدەباەۆ سۇتتەن اق، سۋدان تازا ما؟" دەپ اتالاتىن جازباسىندا قوعام بەلسەندىسى وراز الىمبەكوۆ كۇدەرباەۆتىڭ قاندى قاڭتار قارساڭىنداعى ءىc-ارەكەتىن سىنعا الادى. سونىمەن قاتار، ونىڭ قىزمەتتىڭ ورلەۋىنە قاتىستى كۇمانىن دە جوققا شىعارمايدى.
- فب-دا الماتى وبلىسى ءىىد-ءنىڭ بۇرىنعى باستىعى، پوليتسيا گەنەرال-مايورى سەرىك كۇدەباەۆتىڭ قاڭتار وقيعاسى كەزىندەگى قىلىعىن جۋىپ-جايىپ اقتاپ الۋ ناۋقانى باستالىپتى. قاراپ تۇرسام، كۇدەباەۆتىڭ سويىلىن سوعىپ جاتقان وڭكەي جۋرناليستەر.
قۇرمەتتى ارىپتەستەر، "كۇدەباەۆ بەيبىت ەرەۋىلشىلەرگە قارسى وق اتۋ بۇيرىعىن ورىندامادى، سول ءۇشىن كىنالى بولىپ جاتىر" دەپ ءبىر جاقتى پىكىر ايتپاس بۇرىن، قاڭتاردا ادام ءولىمى بويىنشا تالدىقورعان ايماعى ەكىنشى ورىن، ال قامالعان ازاماتتاردى ازاپتاۋ بويىنشا ءبىرىنشى ورىن العانىن ءبىر ءسات قاپەرگە الساڭدارشى. ازاپتاۋدىڭ "زاماناۋي" ءتاسىلى - ىستىق ۇتىك تە وسى ايماقتا قولدانىلدى عو. ەندى كەلىپ گەنەرال كۇدەباەۆ جاقسى، باسقا گەنەرالدار جامان بوپ قالىپ پا؟! لوگيكا قايدا؟!
جاعدايدى تۇسىنەتىن ادام گەنەرالداردىڭ ءبارىنىڭ وڭىپ تۇرماعانىن بىلەدى. مىسالى، ءدال وسى كۇدەباەۆتىڭ تۋعان جەرىنەن - جامبىل اۋدانىنان باقانداي 40 گەنەرال شىعىپتى. سوندا الىپ قازاقتانننىڭ كىشكەنتاي ءبىر بولشەگىنە تەك گەنەرال تۋاتىن ايەلدەر جينالىپ قالعان با؟!
وسى جاعدايدى اقىلعا سالىپ ويلانىپ قاراساق، ءبىر جەردەن 40 گەنەرالدىڭ شىعۋى ەسكى قازاقستان تۇسىندا رۋشىلدىق، جەرشىلدىك، جەڭ ۇشىمەن جالعاسقان جەمقورلىق اۋقىمىنىڭ قانات جايىپ، بۇتكىل مەملەكەتتى وردالى جىلانداي وراپ العانىن كورسەتەدى. ال سىزدەر سول جۇيەگە قىزمەت ەتىپ، شەن-شەكپەن العان گەنەرال-مايوردى سۇتتەن اق، سۋدان تازا، قوي اۋزىنان ءجوپ الماعان موماقان قىلىپ كورسەتكىلەرىڭ كەلەدى. ەح، ءبىر كەم دۇنيە...، - دەپ جازدى اۆتور.
الەۋمەتتىك جەلىدە قاڭتار كەزىندەگى سەرىك كۇدەباەۆتىڭ ءىس-قيمىلىن انىق كورسەتەتىن ۆيدەوجازبا تارادى. ۆيدەوجازبادا پوليتسيا دەپارتامەنتى بۇرىنعى باسشىسىنىڭ ءوز قىزمەت ورنىن تاستاپ قاشقانى بەينەلەنەدى.
