الماتىدا ارتىق سالماقتان ارىلامىن دەپ وتا جاساتقان ايەل كوز جۇمدى، دەپ حابارلايدى "ادىرنا" ۇلتتىق پورتالى Almaty.tv-عا سىلتەپ.
47 جاستاعى ايەلدىڭ نە سەبەپتى قايتىس بولعانى ءالى بەلگىسىز. وتا جاساعان دارىگەرلەر ايەلدىڭ ومىرىنە قاۋىپ تونەتىنى تۋرالى ەسكەرتپە جاساماعان دەيدى مارقۇمنىڭ تۋىستارى.
قايعىلى وقيعا 5 شىلدە كۇنى باستالعان. ول قالاداعى جەكە ەمحانالاردىڭ بىرىنە دەنەسىندەگى ارتىق مايدى الدىرىپ تاستاۋ ءۇشىن بارعان. مارقۇم قۇرالاي باتىرحاننىڭ ارتىندا 3 ۇلى قالدى.
ايەل 8 شىلدەدە بولاتىن تۋعان كۇنىن جاڭا دەنە پىشىنىمەن تويلاعىسى كەلگەن.
"نەگە ايتپايدى؟ وسىنداي جاعدايلار بولۋى ىقتيمال دەپ نەگە ەسكەرتپەدى؟ مۇنداي جاعدايلار 90%-دىڭ 2%-دا بولۋى مۇمكىن دەپ ايتپادى. بۇل جەردە وتادان سوڭ 2 ساعاتتان كەيىن جولداسىڭىز الىپ كەتەدى دەپ ايتقان. جۇرەگى توقتاپ قالعانى انىقتالاتىن بولسا، دارىگەرلەردەن جاۋاپكەرشىلىك تولىعىمەن الىنىپ تاستالادى", - دەيدى مارقۇمنىڭ ءسىڭىلىسى گۇلنار باتىرحانوۆا.
مارقۇم وتانى 2 ميلليون تەڭگەگە جاساتقان. اپكەسىنىڭ جاعدايىنان ءجيى حابار الۋعا تىرىسقان ءسىڭىلىسى مارقۇمنىڭ قايتىس بولعانىن دا كەيىن بىلگەن. ايەلدىڭ ءولى دەنەسىن پالاتادان تۋىستارىنا ەسكەرتپەستەن مايىتحاناعا اپارعان.
تۋعان كۇنىن تويلاۋدىڭ ورنىنا ايەلدىڭ دەنەسىن قۇشاقتاپ، زار جىلاعاندار ادىلدىك سۇرايدى.
