23 قاراشادا الماتىدا بالالار فۋتبولىنداعى جىلدىڭ ەڭ ءىرى سپورتتىق شارالارىنىڭ ءبىرى - «بالالار فۋتبول ليگاسى» بويىنشا قالالىق چەمپيوناتتىڭ جەڭىمپازدارى مەن جۇلدەگەرلەرىن ماراپاتتاۋ ءراسىمى ءوتتى.
بيىلعى ماۋسىم تامىزدان قاراشاعا دەيىن جالعاستى، وعان قالانىڭ بارلىق اۋداندارىنداعى فۋتبول مەكتەپتەرى مەن اكادەميالارى اتىنان 300 كوماندادان 5000-نان استام بالا قاتىستى. ءراسىم بارىسىندا 7–17 جاس ارالىعىنداعى كوماندالار، سونداي-اق قىزدار اراسىنداعى ءتۋرنيردىڭ U11 جانە U14 ساناتتارى بويىنشا جەڭىمپازدار ماراپاتتالدى. تۋرنير الماتىداعى بۇقارالىق سپورتتىڭ نەگىزگى جوبالارىنىڭ ءبىرى رەتىندە بالالار مەن جاسوسپىرىمدەردىڭ تۇراقتى جارىس پروتسەسىنە جوعارى دەڭگەيدە قاتىسۋىن قامتاماسىز ەتتى.
جاس فۋتبولشىلاردى قازاقستاندىق تانىمال سپورتشىلار مەن فۋتبول قايراتكەرلەرى - سابىرحان يبراەۆ، سەرگەي كليموۆ، ەدۋارد گلازۋنوۆ، يگور ۋتروبين، سەرگەي سكورىح، ەلميرا ابدۋللاەۆا جانە ۆيكتور كاتكوۆ قۇتتىقتادى. ولاردىڭ قاتىسۋى بالالار ءۇشىن ماڭىزدى ىنتالاندىرۋشى جانە شابىتتاندىرۋشى فاكتور بولدى.
الماتى فۋتبول فەدەراتسياسىنىڭ باسشىسى باۋىرجان تالعاتۇلى:
«ەل پرەزيدەنتى قاسىم-جومارت توقاەۆ بىرنەشە رەت اتاپ وتكەندەي، بۇقارالىق سپورتتى دامىتۋ - دەنى ساۋ جاستاردى تاربيەلەۋدىڭ جانە ۇلت دەنساۋلىعىن نىعايتۋدىڭ نەگىزگى شارتى. ءبىزدىڭ تۋرنير - بۇقارالىق سپورتتىڭ تاجىريبەدە قالاي دامىپ كەلە جاتقاندىعىنىڭ ايقىن دالەلى: فۋتبولمەن اينالىسۋعا قولجەتىمدى جاعدايلار جاسالدى، مىڭداعان بالا سپورتقا تارتىلۋدا. “بالالار فۋتبول ليگاسى” - جاي عانا جارىس ەمەس. بۇل - ارمان، ۇلكەن ماقساتتار جانە الماتىلىقتاردىڭ جاڭا ۇرپاعىن تاربيەلەۋ تۋرالى جوبا. ءبىز وسى ماۋسىمدا الاڭعا شىققان ءاربىر بالانى ماقتان تۇتامىز»، - دەپ اتاپ ءوتتى.
الماتى فۋتبول فەدەراتسياسى جاتتىقتىرۋشىلارعا، اتا-انالارعا، تورەشىلەرگە جانە ەرىكتىلەرگە ريزاشىلىعىن بىلدىرەدى. قالادا بۇقارالىق فۋتبولدى جانە بالالار مەن جاسوسپىرىمدەرگە ارنالعان سپورت جوبالارىن دامىتۋعا جۇيەلى قولداۋ كورسەتىپ الماتى قالاسى اكىمدىگىنە ەرەكشە العىس ايتىلادى.
