الماتىدا كولىك قوزعالىسىن رەتكە كەلتىرۋ جانە جولداعى كەپتەلىستەردىڭ الدىن الۋ ماقساتىندا بىرنەشە جول قيىلىسىنا جاڭا جول تاڭباسى — «ۆافەلنيتسا» سىزىلدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
الماتى پوليتسيا دەپارتامەنتىنىڭ مالىمەتىنشە، بۇل تاڭبا اباي – نازارباەۆ، اباي – مومىشۇلى جانە تولە بي – روزىباكيەۆ كوشەلەرىنىڭ قيىلىستارىندا پايدا بولعان.
«ۆافەلدى» تاڭبانىڭ نەگىزگى ماقساتى — جۇرگىزۋشىلەرگە قيىلىس بوس بولماسا، وعان كىرۋگە بولمايتىنىن ەسكەرتۋ. مۇنداي بەلگى قازاقستان رەسپۋبليكاسىنىڭ جول قوزعالىسى قاعيدالارىندا بار جانە كولىك اعىنىن ءتيىمدى باسقارۋعا باعىتتالعان.
— بۇل شارا ءجيى كەزدەسەتىن جاساندى كەپتەلىستەردى ازايتۋعا باعىتتالعان. مۇنداي جاعدايلار كوبىنەسە جۇرگىزۋشىلەردىڭ بوس ەمەس قيىلىسقا شىعۋىنان تۋىندايدى. جاڭا تاڭبا كولىك قوزعالىسىن رەتتەپ، جول قاۋىپسىزدىگىن ارتتىرۋعا كومەكتەسەدى، — دەدى الماتى پد اكىمشىلىك پوليتسيا باسقارماسىنىڭ باستىعى اسحات قۇلباەۆ.
ايتا كەتەيىك، بۇعان دەيىن الماتى اكىمدىگى قالاداعى كولىك جۇكتەمەسىن ازايتۋ ءۇشىن جۇمىس ۋاقىتىنىڭ كەستەسىن وزگەرتۋ، سونداي-اق قاشىقتان جۇمىس ىستەۋ فورماتىن كەڭەيتۋ سياقتى شارالاردى قولعا العان بولاتىن.
