قازاقستاندا ەمدەلۋ باعاسى تاعى دا قىمباتتادى، دەپ حابارلايدى “ادىرنا” ۇلتتىق پورتالى.
زەرتتەۋ ناتيجەلەرىنە سۇيەنسەك، 2021 جىلدىڭ قازان ايىنىڭ سوڭىندا مەديتسينالىق قىزمەتتەر باعاسى ايلىق ديناميكا بويىنشا 0,3%-عا، جىلدىق ديناميكا بويىنشا 10,1%-عا ءوستى.
جىل سايىنعى باعانىڭ ءوسۋى الماتى (20%-عا), تۇركىستان (18,1%) جانە پاۆلودار (15,6%) وبلىستارىنىڭ تۇرعىندارىنا قاتتى اسەر ەتەدى،دەپ حابارلادى Energyprom.kz ساراپشىلارى.
ەمدەلۋ باعاسىنىڭ ەڭ از ءوسىمى اقتوبە وبلىسىندا (جىلىنا 0,8%-عا) تىركەلدى.
2021 جىلدىڭ ءبىرىنشى جارتىجىلدىعىندا اۋرۋحانا قىزمەتتەرى 618,7 ملرد تەڭگەگە جەتتى. بۇل وتكەن جىلمەن سالىستىرعاندا 60,3%-عا ارتىق.
2020 جىلدىڭ قاڭتار-ماۋسىم ايلارىندا قىزمەت كورسەتۋ كولەمى جىلىنا 12,9%-دى الىپ، 385,9 ملرد تەڭگەنى قۇراعان بولاتىن.
قىزمەتتەردىڭ باسىم بولىگى بيۋدجەت قاراجاتى ەسەبىنەن كورسەتىلدى: 547,8 ملرد تەڭگە، + 56,7%. حالىق ەسەبىنەن قىزمەت كورسەتۋ 66,7%-عا، ياعني 38,7 ملرد تەڭگەگە، كاسىپورىندار ەسەبىنەن 2,4 ەسەگە، 32,2 ملرد تەڭگەگە ءوستى.
وڭىرلىك تۇرعىدان الىپ قاراساق، سەكتورداعى قىزمەت كورسەتۋدىڭ ەڭ ۇلكەن كولەمى الماتى قالاسىندا: 99,4 ملرد تەڭگە – ءبىر جىل بۇرىنعى ەسەپتەن 67,2%-عا ارتىق.
ۇزدىك ۇشتىككە: نۇر-سۇلتان (79 ملرد تەڭگە، +79,2%) تۇركىستان وبلىسى (56,3 ملرد تەڭگە، + 74,9%) كىردى.
ەڭ از قىزمەت كورسەتۋ ءوسىمى اتىراۋ وبلىسىندا تىركەلدى: بار بولعانى 11,7 ملرد تەڭگە – ءبىر جىل بۇرىنعىدان 33,4%-عا ارتىق.
ايتا كەتەتىن جايت، جىل باسىنان بەرى اۋرۋحانالاردىڭ حيرۋرگيالىق بولىمشەلەرىنىڭ قىزمەتى 107,2 ملرد تەڭگەگە جەتىپ، ءبىر جىل بۇرىنعى كورسەتكىشتەن 33,9%-عا ارتىق.
“ادىرنا” ۇلتتىق پورتالى
