كەزىندە وپپوزيتسيالىق ساياساتكەر رەتىندە قاتار جۇرگەن كاسىپكەرلەر تولەن توقتاسىنوۆ پەن عالىمجان جاقيانوۆ اراسىنداعى داۋ-داماي ءالى بىتەر ەمەس.
قازىر ەكس-دەپۋتات تولەن توقتاسىنوۆ اۋىر دەرتپەن كۇرەسۋدە. ول وڭتۇستىك كورەيادا ەم الىپ جاتىر. بۇل تۋرالى توقتاسىنوۆتىڭ ايەلى الما توقتاسىنوۆا “ادىرنا” ۇلتتىق پورتالىنا ايتىپ بەردى.
- تولەن اۋىرىپ جاتىر، سوندىقتان مەن ءبارىن ءبىر جاققا ىسىرىپ قويدىم. بىراق «جاۋ» ۇيىقتاپ جاتقان جوق جانە جاعدايدى پايدالانۋدى ۇيعاردى، - دەيدى الما توقتاسىنوۆا.
ونىڭ ويىنشا، جۇبايىنىڭ ەسكى دوستارى اۋىرىپ جاتقانىنا قاراماي، سوتقا ارىزدانۋىن دوعارار ەمەس.
- 12 ماۋسىمدا عالىمجان جاقيانوۆ، ال 14 ماۋسىمدا تاگير سيسينباەۆ جوعارعى cوتقا مەدەۋ جانە الماتى قالالىق سوتتارىنىڭ جاقيانوۆتىڭ تولەن ەكەۋمىزدەن اقشا ءوندىرۋ تۋرالى تالاپ ارىزىن قاناعاتتاندىرۋدان باس تارتقان شەشىمدەرىنە كاسساتسيالىق شاعىم ءتۇسىردى. سوتتار اشىق رەجيمدە ءباسپاسوزدىڭ باقىلاۋىمەن ءىس ماتەريالدارى مەن بارلىق تاراپتار ۇسىنعان دالەلدەمەلەردى مۇقيات زەردەلەي كەلە، تولەننىڭ بىرلەسكەن كاسىپكەرلىكتە ۇلەسى بار ەكەنىن، ول ءۇشىن عالىمجان وعان ءبىرىنشى ترانشتى تولەگەنىن انىقتاعان ەدى. سونداي-اق، سوت جاقيانوۆتىڭ تولەننىڭ ۇلەسىن ساتىپ، ءليدىڭ اقشاسىن جىمقىرعان قىتايلىقتارمەن كەلىسىمىن دە دالەل رەتىندە قاراستىردى. سوت شەشىمى زاڭدى كۇشىنە ەندى. بىراق بۇل ادامدار قايتا ارىزدانۋدا. ولار سۇحباتتاردا ەكس-سۋديا جانە اكىم رەتىندە وزدەرىنىڭ ادالدىعى تۋرالى ايتادى، الايدا ءبارى كەرىسىنشە..، - دەيدى الما توقتاسىنوۆا.
الما توقتاسىنوۆا جاقيانوۆ پەن سيسينباەۆ جوعارى سوتقا ارىزدانۋ ءۇشىن «جاڭا سحەما» ويلاپ تاپقان سەكىلدى دەيدى.
- جاقيانوۆ تالعارعا مەكەنجايىن وزگەرتكەن، بىراق ول تالعاردا تۇرمايدى. ال سيسينباەۆ تولەن ەكەۋىنىڭ اراسىنداعى كەلىسىم-شارتتى جارامسىز دەپ تانۋ تۋرالى تالاپ-ارىزبەن جاقيانوۆتىڭ «تۇرعىلىقتى جەرى» بويىنشا تالعار سوتىنا جۇگىنىپتى. مەنىڭ ويىمشا، ولار قالالىق سوتتان جەڭىلگەن سوڭ، ادەيى مەكەن-جايىن وزگەرتىپ، سوتتى اقشامەن شەشكىسى كەلەتىن سەكىلدى. سيسينباەۆ بۇرىن جوعارعى سوتتا جۇمىس ىستەگەن بولاتىن. ەندى تانىستارىنا شىعىپ، وزىنە دۇرىس شەشىم شىعارتىپ الماق دەپ ويلايمىن،- دەيدى الما توقتاسىنوۆا.
ال بۇل تۋرالى عالىمجان جاقيانوۆتان جاۋاپ الۋ مۇمكىن بولمادى.
ايتا كەتەيىك، 20 ماۋسىمدا الماتى قالاسى الاتاۋ اۋداندىق سوتىندا عالىمجان جاقيانوۆتىڭ “ادىرنا” ۇلتتىق پورتالى مەن تولەن توقتاسىنوۆقا بەرگەن ارىزىنىڭ اپپەلياتسيالىق سوتى وتكەن بولاتىن. سوت شەشىمى وزگەرىسسىز قالدى.
بيىل 4 ناۋرىزدا جاريالانعان سوت قورىتىندىسى “ادىرنا” ۇلتتىق پورتالىنىڭ YouTube ارناسىنداعى سۇحباتتى وشىرۋگە جانە تولەن توقتاسىنوۆقا ونداعى دەرەكتەردى جوققا شىعارۋىنا شەشىم شىعاردى. سونداي-اق، توقتاسىنوۆ 200 مىڭ تەڭگە تولەۋگە مىندەتتى بولدى. ال “ادىرناعا” قويىلعان قارجىلىق تالاپتار نەگىزسىز دەپ تانىلعان بولاتىن. بۇل شەشىممەن “ادىرنا” ۇلتتىق پورتالى كەلىسپەي اپپەلياتسياعا ۇسىنعان ەدى.
