"نافتوگاز" قازاقستان اۋماعىندا رەسەيلىك "گازپروم" كومپانياسىنان شامامەن $1,4 ملرد وندىرۋگە رۇقسات العانىن مالىمدەدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
ءتيىستى شەشىمدى استانا حالىقارالىق قارجى ورتالىعىنىڭ سوتى قابىلداعان. كومپانيا مالىمەتىنشە، احقو سوتى حالىقارالىق اربيتراج شەشىمىن تانىپ، ونى قازاقستان اۋماعىندا ورىنداۋعا رۇقسات بەرگەن.
سەرگەي كورەتسكي بۇل شەشىمدى «گازپرومنان» قاراجات ءوندىرىپ الۋ جولىنداعى ماڭىزدى قادام دەپ اتادى.
«قازاقستانداعى سوت شەشىمى – بۇل «گازپرومنان» قاراجات ءوندىرىپ الۋ پروتسەسىندەگى تاعى ءبىر پراكتيكالىق ناتيجە. ءبىز ءارتۇرلى يۋريسديكتسيالاردا اربيتراجدىق شەشىمدى ورىنداۋ بويىنشا جۇمىستى جالعاستىرىپ جاتىرمىز»، – دەدى ول.
«نافتوگازدىڭ» تۇسىندىرۋىنشە، 2019 جىلعى كەلىسىم بويىنشا كومپانيا 2025 جىلدىڭ 1 قاڭتارىنا دەيىن ۋكراينا اۋماعى ارقىلى رەسەيلىك گاز ءترانزيتىن ۇيىمداستىرۋعا مىندەتتى بولعان. الايدا 2022 جىلدىڭ مامىرىندا رەسەيلىك وككۋپاتسيالىق كۇشتەردىڭ ارەكەتى سالدارىنان «سوحرانوۆكا» گاز قابىلداۋ نۇكتەسى ارقىلى ترانزيت توقتاعان. سوعان قاراماستان، ۋكراين تاراپى «سۋدجا» نۇكتەسى ارقىلى گاز تاسىمالداۋ قىزمەتىن جالعاستىرعان.
كومپانيانىڭ ايتۋىنشا، "گازپروم" كەلىسىمشارتتاعى مىندەتتەمەلەرىن تولىق ورىنداماي، كورسەتىلگەن قىزمەت ءۇشىن تولەم جاساۋدان باس تارتقان. وسىعان بايلانىستى 2022 جىلدىڭ قىركۇيەگىندە "نافتوگاز" حالىقارالىق ساۋدا پالاتاسى رەگلامەنتىنە سايكەس شۆەيتساريادا اربيتراجدىق تالقىلاۋدى باستاعان.
2025 جىلدىڭ ماۋسىمىندا اربيتراجدىق تريبۋنال «گازپرومدى» كەلىسىم مىندەتتەمەلەرىن ورىنداماعانى ءۇشىن تولىق جاۋاپتى دەپ تانىپ، قارىزدى، پايىزداردى جانە اربيتراج شىعىندارىن تولەۋگە مىندەتتەگەن.
بۇگىندە «نافتوگاز» ءتۇرلى ەلدەردەگى يۋريسديكتسيالار ارقىلى «گازپرومنىڭ» اكتيۆتەرىن ءوندىرىپ الۋ بويىنشا حالىقارالىق جۇمىستى جالعاستىرىپ جاتىر.
