عالىمجان جاقيانوۆ - بۇل ەسىم-سويدى مۇقىم قازاق قۇرمەت تۇتادى. ونىڭ ەكى مىڭىنشى جىلداردان بەرى اۆتوريتارلى بيلىكتىڭ دەگەنىنە كونبەي، قازاقستاندى دەموكراتيالىق مەملەكەت ەتۋ جولىندا ايانباي كۇرەسىپ كەلە جاتقانىن، ءتىپتى ساياسي كوزقاراسى ءۇشىن اباقتىعا دا قامالعانىن ەشكىم جوققا شىعارا المايدى. قوعام عالىمجان جاقيانوۆتى اشىق ويلى، ءادىل، شىنشىل، ۇستانىمى جولىندا قۇرباندىققا بارا الاتىن ادام دەپ تانيدى. وسىنداي ماقتاۋلى مىنەزدەرىمەن كوپتىڭ كوڭىلىنەن شىققان ايتۋلى ازامات قاپەلىمدە جۇرىسىنەن جاڭىلىپ ءجۇر. سوڭعى بەس-التى اي كولەمىندە عالىمجان جاقيانوۆ تاراپىنان “ادىرنا” ۇلتتتىق پورتالىنا جاسالعان قىسىم ءبىزدى وسىلاي ايتۋعا ماجبۇرلەپ وتىر.
2023 جىلدىڭ 2-قاڭتارى كۇنى “ادىرنا” ۇلتتىق پورتالىنىڭ يۋتۋب ارناسىندا "عالىمجان جاقيانوۆقا سەنىپ ەدىم" دەگەن تاقىرىپپەن كاسىپكەر توقتاسىنوۆ تولەن مۇحامەديۇلىنىڭ سۇحباتى جاريالاندى.
ارينە، بۇل پورتال ءۇشىن قالىپتى كوپ سۇحباتتىڭ ءبىرى عانا ەدى. قازاق ەلىن بىلاي قويىپ، جات ەل موڭعوليادا كاسىپ ىستەپ كەلگەن، عالىمجان جاقيانوۆتىڭ ومىرلىك دوسى بولعان، ەكس-دەپۋتات تولەن توقتاسىنوۆتىڭ ايتار ويىنا، جەكە پىكىرىنە شەكتەۋ قويۋعا ءبىزدىڭ حاقىمىز جوق. ول دەموكراتيالى مەملەكەت قۇندىلىقتارىنا سايكەس ءوزىنىڭ اشىق وي ايتۋ قۇقىعىن پايدالانىپ، پورتالىمىزدىڭ يۋتۋب ارناسىنا ىشتەگى بار شەرىن اقتاردى.
تولەن توقتاسىنوۆ پەن عالىمجان جاقيانوۆ ەكەۋىنىڭ اراسىنداعى قارجىلىق داۋلى ماسەلەلەردىڭ جارىققا شىعۋى، ارينە، جاقيانوۆقا جاقپاپتى. ارادا ەكى كۇن وتپەي جاتىپ، ءوزىن جاقيانوۆتىڭ ادۆوكاتىمىن دەپ تانىستىرعان مۋستاحيم تۋلەەۆ اتتى ازامات "سۇحباتتى وشىرمەسەڭدەر، سوتقا بەرەمىز" دەپ قورقىتۋدى باستادى. ولاردىڭ لوگيكاسىنا سۇيەنسەك، "توقتاسىنوۆ قىلمىسكەر ەكەن. ءبىزدىڭ پورتالدىڭ قىلمىسكەردەن سۇحبات الۋعا حاقىسى جوق ەكەن-ءمىس".
ارتىنشا، رەداكتسيامىزعا بۇل سۇحباتتى تەرىستەيتىن جاقيانوۆتىڭ مالىمدەمەسى كەلىپ ءتۇستى. ءبىز بۇقارالىق اقپارات قۇرالى رەتىندە تىزگىندى تەڭ ۇستاپ، مالىمدەمەنىڭ ءبىر ءارپىن دە وزگەرتپەي "تولەن جەكە باسىنىڭ قارىزىنان قۇتىلا الماي، ەندى ماعان جالا جابۋعا كىرىستى" دەگەن تاقىرىپپەن جاريالادىق.
4 قاڭتار كۇنى جاقيانوۆتىڭ ادۆوكاتى مالىمدەمەنىڭ ورىسشا نۇسقاسىن جانە جولداپ، ونى دا جاريالاۋ كەرەكتىگىن ايتتى.
ءبىز وعان دا پورتال بەتىنەن ورىن بەردىك. بۇل مالىمدەمەنى سول كۇندەرى جاقيانوۆتىڭ جارى قارلىعاش جاقيانوۆا Facebook-تەگى جەكە پاراقشاسىنا سالىپ، وقىرمانعا جاپپاي تاراتتى.
عالىمجان جاقيانوۆ “ادىرنا” ۇلتتىق پورتالىنا جاريالانعان سۇحبات بويىنشا، "ار نامىسىما نۇقسان كەلتىردى" دەپ تولەن توقتاسىنوۆتى سوتقا بەردى. ال، تولەن توقتاسىنوۆ عالىمجان جاقيانوۆتىڭ ورىسشا مالىمدەمەسىن نەگىزگە الىپ، زاڭ ورگاندارىنا جۇگىندى. قىزىعى سول، جاقيانوۆ ورىسشا مالىمدەمەسىنەن دەرەۋ باس تارتتى. وسى ۋاقىتقا دەيىنگى جاريالاعان اقپاراتتارىن جوققا شىعارىپ، سوزدەن تايقىپ شىعا كەلدى.
ءبىزدىڭ قولىمىزدا ادۆوكات مۋستاحيم تۋلەەۆتىڭ جازبالارى بار. جاقيانوۆ "مالىمدەمەنى جاريالاۋ كەرەك" دەپ جولداعان ادۆوكاتىنىڭ حاتىن قوقىسقا لاقتىرا سالىپ، بىزگە رەسمي حات تا جولدادى.
ماقتاۋلى دەموكرات ادامنىڭ قۇبىلىپ شىعا كەلۋىن قالاي تۇسىنۋگە بولادى؟ ءوزى، ءوزىنىڭ ومىرلىك جارىنىڭ الەۋمەتتىك جەلىدەگى پاراقشاسى ارقىلى تاراتقان مالىمدەمەسىن مىڭداعان وقىرمان وقىعاننان كەيىن وشىرە سالىپ، "ادىرنانى" بىرجاقتى قارالاۋ قانشالىقتى ادىلەتتى؟
ابايدىڭ ء"بىر جانعا ەكى كۇيمەك ادىلەت پە؟" دەگەن ءسوزى بار عوي. سول ايتپاقشى، تولەن توقتاسىنوۆتىڭ سۇحباتىنا بايلانىستى، "قىلمىسكەردەن سۇحبات الۋعا حاقىلارىڭ جوق" دەپ ايىپتاعاندارى ازداي، ارتىنشا وزدەرى مالىمدەمە جولداپ، ودان تايقىپ شىعا كەلۋى ء"بىر جانىمىزدى" ەكى كۇيدىردى. "قىلمىسكەردەن سۇحبات الۋعا حاقىلارىڭ جوق" دەپ ۇستەم تالاپ قويعان مۋستاحيم تۋلەەۆ بۇل كۇندەرى ەكى ايعا قاماۋعا الىنعان. ول عالىمجان جاقيانوۆتىڭ عانا ەمەس، بۇرىنعى مادەنيەت ءمينيسترى بولعان ارىستانبەك مۇحامەديۇلىنىڭ دا ادۆوكاتى بولعان ەكەن. قازىر “مۇحامەديۇلىنىڭ جازاسىن جەڭىلدەتۋ ءۇشىن سوتقا ءىرى كولەمگە پارا ۇسىندى" دەگەن ايىپپەن تەرگەلىپ جاتىر.
“ادىرنا” ۇلتتىق پورتالىنىڭ قىزمەتكەرلەرى 5 قاڭتار كۇنى جاقيانوۆتىڭ بىزگە سۇحبات بەرۋىن سۇراپ، بۇگىندە قاماۋدا وتىرعان ادۆوكاتى مۋستاحيم تۋلەەۆكە حابارلاستى. ول كىسى بۇل ماسەلەگە قاتىستى وزىمەن جەكە كەلىسۋ كەرەكتىگىن ايتىپ تەلەفون ءنومىرىن بەردى. جاقيانوۆ ءبىزدىڭ ۋاتساپ ارقىلى جولداعان وتىنىشىمىزگە پىسقىرىپ تا قارامادى. تەك ماتىندىك مالىمدەمە جاساۋمەن شىندىق اشىلمايتىنىن ايتىپ، جاقيانوۆتىڭ اشىق ويىن پورتالعا جاريالاۋعا دايىن ەكەنىمىزدى جانە ءبىلدىرىپ، Facebook-تەگى پاراقشامىز ارقىلى دا سۇحباتقا شاقىردىق. وعان دا جاۋاپ بولمادى.
ءباسپاسوز زاڭدارىنا سايكەس ءبىزدىڭ بۇيرەگىمىز ەش تاراپقا دا بۇرىلمايدى. جاقيانوۆ بۇگىن كەلىسسە، ونىڭ ايتقان سوزدەرىن وزگەرتپەستەن بۇگىن جاريالاۋعا دايىنبىز. ويتكەنى، عالىمجان جاقيانوۆ تاعدىرىن قۇربان ەتىپ، ۇزاق جىلدار بويى كۇرەسكەن دەموكراتيانىڭ داڭعىل جولى وسى. بىراق، جاقيانوۆقا قوعامنىڭ الدىنا شىعىپ، ءوز ويىن اشىق ايتۋدان گورى تاسادا تۇرىپ ۇلتتىق پورتالعا قىسىم جاساۋ، سول قىسىم ارقىلى پورتالدىڭ يۋتۋب ارناسىندا جاريالانعان تولەن توقتاسىنوۆتىڭ سۇحباتىن العىزىپ تاستاۋ عانا قاجەت سياقتى.
بۇلاي دەۋىمىزگە 2023 جىلدىڭ 14 شىلدە كۇنى عالىمجان جاقيانوۆتىڭ تاعى ءبىر ادۆوكاتى يۋ.ۆەرشينينانىڭ بىزگە جولداعان سوتقا دەيىنگى شاعىم حاتى سەبەپ بولىپ وتىر. ول شاعىمدا "عالىمجان جاقيانوۆقا سەنىپ ەدىم" اتتى تولەن توقتاسىنوۆپەن بولعان سۇحباتتى “ادىرنا” پورتالىنىڭ يۋتۋب ارناسىنان ءوشىرىپ، ءمورالدى شىعىن ءۇشىن 1 000 000 تەڭگە تولەۋ قاجەتتىگىن، ەگەر كەلىسپەگەن جاعدايدا سوتقا بەرەتىنىن جازىپ جانە قورقىتىپتى. وسىلاي تولەن توقتاسىنوۆتىڭ جاقيانوۆ تۋرالى ايتقان ۋاجدەرىن تۇنشىقتىرا سالماق كورىنەدى.
عالىمجان جاقيانوۆ سىندى دەموكرات ازاماتقا بۇل لايىق ءىس پە؟ جاقيانوۆتىڭ توقتاسىنوۆتىڭ ايتقاندارىن يۋتۋب ارنامىزدان جويىپ جىبەرىپ، ونىڭ اشىق وي ءبىلدىرۋ قۇقىعىن شەكتەپ تاستاۋعا حاقىسى بار ما؟ “ادىرنا” ۇلتتىق پورتالى جاقيانوۆتىڭ ءۋاجىن جاريالاماي جاتسا، تەك توقتاسىنوۆتىڭ ءسوزىن سويلەپ، نەگىزسىز قارالاسا، وندا سوتقا جۇگىنۋگە بولار. ءوزى اشىق سۇحباتقا كەلىسپەي، توقتاسىنوۆپەن تەڭ دارەجەدە پورتال ۇسىنعان مىنبەرگە شىعىپ، تويتارىس بەرۋ قۇقىن پايدالانباي وتىرىپ، مورالدىك شىعىن تالاپ ەتۋى قانشالىقتى ادىلەتتى؟ جاقيانوۆ دەگەن ابىرويلى اتپەن ونسىز دا قال-جاعدايى ءماز ەمەس قازاق باسىلىمىنان مورالدىك شىعىن تالاپ ەتۋى قاي قيسىنعا ساي كەلەدى؟
بۇل سۇراققا بالكىم، عالەكەڭنىڭ ءوزى جاۋاپ بەرىپ قالار! قازاق قۇرمەت تۇتقان ازاماتقا قارسىلىق كورسەتىپ، وعان تىزە باتىرۋ ويىمىزدا جوق. "قيسىنسىز قىسىم جاساپ، اعامىز جاڭىلا كورمەسە ەكەن" دەگەن ىزگى نيەتپەن وسىمەن توقتايمىز!
قۇرمەتپەن، “ادىرنا” ۇلتتىق پورتالى
