بۇگىن اتىراۋ قالالىق №2 سوتىندا وبلىس اكىمىنىڭ ەكس-ورىنباسارى باقىتگۇل حامەنوۆا سوتتا ءوزىنىڭ سوڭعى ءسوزىن ايتتى، دەپ حابارلايدى “ادىرنا” ۇلتتىق پورتالى.
ول تەرگەۋگە كوڭىلى تولمايتىنىن ايتىپ، كىناسىز ەكەنىن مالىمدەپ، ءوزىن اقتاۋدى سۇرادى. سونداي-اق، حامەنوۆا سوڭعى سوزىندە سوتتىڭ باستالعانىنان بەرى 11 اي وتكەنىن، سوندىقتان قىلمىستىق وقيعا جەتكىلىكتى تۇردە تولىق جانە تەرەڭ تەرگەلدى دەپ سانايتىنىن اتاپ ءوتتى.
ءسوز باسىندا ول ونىڭ ءىسىن انتيكور قىزمەتكەرلەرى تولىعىمەن ويدان شىعارعانىن سول سەبەپتى ءوزىنىڭ كىناسىز ەكەنىن دە ايتتى.
"ولار ەشنارسەنى جاسىرماي، جاساعان قىلمىستارىن ايتىپ بەردى. ءبىز ولاردىڭ قىلمىسى تۋرالى ايتقاندارىن شىندىق دەۋگە قۇقىلىمىز. بۇل شىندىققا قول جەتكىزۋدى ايتارلىقتاي جەڭىلدەتەدى. كىنامدى مويىنداپ، ءوزىم جايلى ايتا كەلە، مەنىڭ بۇل ىسكە قاتىسىم باستاپقىدا بولماعانى بەلگىلى بولدى. مەملەكەتتىك ايىپتاۋشى مۇنى كورمەي مە، الدە ءوزىنىڭ قىلمىستىق ارەكەتسىزدىگىن مويىنداعىسى كەلمەي مە، مۇلدەم كەرەعار پىكىردى ايتىپ وتىر", – دەدى حامەنوۆا سوتتا.
سونىمەن قاتار، ول سوتتالۋشىلار – وبلىستىق مادەنيەت باسقارماسىنىڭ بۇرىنعى باسشىسى اقىلبەك رىسقاليەۆ پەن "بالقىتۋ" جشس ديرەكتورى ءومىرتاي اداموۆتىڭ كىناسىن ولاردىڭ ەشقايسىسى داۋلامايتىنىن جەتكىزدى. ودان بولەك، قازىر ازاماتتاردىڭ كوپشىلىگى قازاقستاندىق سوتقا سەنبەيتىنىن اتاپ وتكەن. ءوزىنىڭ ءىسىن سوزىنە دايەك ەتكەن ول بۇل جاعدايدىڭ سەنۋگە بولمايتىنىن كورسەتكەنىن ايتقان.
"ويتكەنى بۇل ىسكە قاتىسى بار انىقتاۋشىلار، تەرگەۋشىلەر، پروكۋرورلار زاڭ مۇددەسىنە وپاسىزدىق جاساپ، ماعان ويدان شىعارىلعان ايىپتى اشىق قولداپ وتىر. سوت تا وسى جولمەن كەتە بەرەتىن بولسا ەلىمىزدىڭ، بالالارىمىزدىڭ جارقىن دا باياندى بولاشاعىنا سەنىمىمىز وشەدى. سەبەبى وسىنداي جاعدايدا زاڭ ۇستەمدىگىن قامتاماسىز ەتۋ، قۇقىقتىق مەملەكەت قۇرۋ ۇراندارىنىڭ جالعان ەكەنىن كورۋگە بولادى", – دەيدى ايىپتالۋشى.
ءسوزىنىڭ سوڭىندا حامەنوۆا ءوزىن اقتاۋدى جانە ءادىل ۇكىم شىعارۋدى سۇرادى.
"ماعان تاعىلعان ايىپتى الىپ تاستاپ، بۇرىن جاريالاعان جەكە شەشىمدى شىعارۋىڭىزدى سۇرايمىن. مەن قىلمىسكەر ەمەسپىن، سوندىقتان ءوز كىناسىزدىگىمدى دالەلدەۋ ءۇشىن سوڭىنا دەيىن بارامىن", – دەپ قورىتىندىلادى ول.
سونداي-اق، سوتتا سوڭعى سوزدەرىن سوتتالۋشىلار وبلىستىق مادەنيەت باسقارماسىنىڭ بۇرىنعى باسشىسى اقىلبەك رىسقاليەۆ پەن "بالقىتۋ" جشس ديرەكتورى ءومىرتاي اداموۆ ايتتى. ۇكىم 15 قاراشادا شىعادى.
ايتا كەتەيىك، ەكس-شەنەۋنىك پەن وبلىستىق مادەنيەت باسقارماسىنىڭ باسشىسى اقىلبەك رىسقاليەۆ اتىراۋدا اباي ەسكەرتكىشىن ورناتۋعا مەملەكەتتىك ساتىپ الۋ كەلىسىمىن جاساسۋ ءۇشىن 4,5 ميلليون تەڭگە كولەمىندە پارا الدى دەگەن كۇدىككە ءىلىندى.
