الماتى سوتى ساياسي بەلسەندى جانە جۋرناليست جانبولات مامايعا بيلىكتەگى "نۇر وتان" پارتياسى توراعاسىنىڭ ءبىرىنشى ورىنباسارى باۋىرجان بايبەكتى سىبايلاس جەمقورلىققا ايىپتاعان بەينەروليكتى الىپ تاستاۋدان باس تارتقانى ءۇشىن 140 016 تەڭگە ايىپپۇل سالدى. سوت وتىرىسى اۋەزوۆ اۋداندىق سوتىندا تالاپكەر باۋىرجان بايبەكتىڭ قاتىسۋىنسىز ونلاين رەجيمىندە ءوتتى، دەپ حابارلايدى “ادىرنا” ۇلتتىق پورتالى ءىnformburo.kz سايتىنا سىلتەمە جاساپ.
ماماي سوت شەشىمىن ورىندامايدى.جەكە سوت ورىنداۋشىسى جاينارا السەيىتوۆا جانبولات مامايدىڭ بيلىك پارتياسى توراعاسىنىڭ ورىنباسارىنىڭ تالاپ ارىزى بويىنشا سوت شەشىمىن ورىنداماعانىن ايتتى. بەلسەندى ءوز فيلمىندە باۋىرجان بايبەكتى الماتىدا مافيالىق-سىبايلاس جەمقورلىق قۇرىلىمىن قۇردى دەپ ايىپتاعان. سوت فيلمدە ۇسىنىلعان اقپاراتتى باۋىرجان بايبەكتىڭ ابىرويىنا نۇقسان كەلتىردى دەپ تاۋىپ، جانبولات مامايعا ءفيلمدى الىپ تاستاۋدى جانە 10 كۇننىڭ ىشىندە الەۋمەتتىك جەلىلەردە ءوز ويىنىڭ تەرىس ەكەنىن جاريالاۋدى مىندەتتەدى.
"27 تامىزدا ماعان اتقارۋ پاراعى كەلىپ ءتۇستى. ءدال سول كۇنى بورىشكەرگە تاپسىرىس حاتپەن شارا قولدانۋ تۋرالى ەسكەرتۋى بار حابارلاما جىبەرىلدى. 3 قىركۇيەكتە مەن مامايدىڭ كەڭسەسىنە باردىم جانە حابارلامانى جەكە تاپسىردىم، ال بورىشكەر ارىزدانۋشىعا قاتىستى قىلمىستىق ءىس قوزعاۋ ءۇشىن پروكۋراتۋراعا جۇگىنگەنى تۋرالى ايتىپ سوعان بايلانىستى ول قۇقىق قورعاۋ ورگاندارىنىڭ رەسمي جاۋابىن كۇتىپ وتىرعاندىعى جونىندە جازباشا تۇسىنىكتەمە بەردى. بۇگىنگى كۇنگە دەيىن تالاپتار ورىندالماعان", - دەدى سوت.
بەلسەندىنىڭ قورعاۋشىسى ەرلان قاليەۆ "بايبەك مىرزانىڭ تاراپى سىبايلاس جەمقورلىق تەرگەۋىنە نەگىز بولاتىن دالەلدەمە بازاسىن تولىق جويۋدى تالاپ ەتىپ جاتقانىن" مالىمدەدى.
"شاعىم بويىنشا ايتاتىن بولسام، مەنىڭ سەنىم ءبىلدىرۋشىم اقپاراتتى وشىرۋدەن باس تارتۋى تۇسىنىكتى ءجايت، سەبەبى بۇل فيلم تىكەلەي اكىمنىڭ ءىس-ارەكەتىندە سول جىلى قالانى باسقارعان باۋىپجان بايبەكتىڭ قىلمىستىق ارەكەت بەلگىلەرىنىڭ بولۋىن كورسەتەتىن جۋرناليستىك زەرتتەۋ ءفيلمى. ءبىر ەپيزود بويىنشا مەملەكەتكە، دالىرەك ايتقاندا، الماتى بيۋدجەتىنە 11 ميلليون دوللار كولەمىندە زالال كەلتىرىلگەن دەپ بولجانادى. بۇل 4 ميلليارد تەڭگەدەن اسا اقشا", - دەپ ءتۇسىندىردى ەرلان قاليەۆ.
مامايدىڭ بەرگەن تۇسىنىگى. جانبولات مامايدىڭ ءوزى بۇۇ ادام قۇقىقتارى جونىندەگى كوميتەتىنەن سوت شەشىمىنىڭ زاڭدىلىعىن راستامايىنشا، ول ۆيدەولاردى جويمايتىنىن ايتتى.
"مەنىڭ ويىمشا، قازاقستاندىق سوتتار "نۇر وتان" مەن ەل بيلىگىنىڭ نوتاريالدى كەڭسەسىنە اينالىپ كەتكەن. سوتتاردا ادىلدىك جوق. ءبىز بۇعان بۇگىن كوز جەتكىزدىك. مەنىڭ سوتتارعا دەگەن سەنىمىم قالمادى. ءبىز الماتى پروكۋراتۋراسىنا ارىز جازدىق. بىراق ونى قاراۋدىڭ ورنىنا ول ءىس سىبايلاس جەمقورلىققا قارسى قىزمەتكە جىبەرىلدى. سىبايلاس جەمقورلىققا قارسى قىزمەت بىزگە جاۋاپ بەرمەي، حاتتى تاشەنوۆا حانىمعا باعىتتايدى. 1 قازاندا ءبىز باس پروكۋراتۋراعا ءوتىنىش جىبەردىك. قازىر ءبىز ولاردىڭ جاۋابىن كۇتىپ وتىرمىز. وسىدان كەيىن ءبىز كاسساتسيالىق شاعىم جولدايمىز جانە مىندەتتى تۇردە بۇۇ ادام قۇقىقتارى جونىندەگى كوميتەتىنە جىبەرەمىز. ەگەر بۇۇ بايبەك تازا، ۇرلىق جاساماعان دەسە، مەن ءوز كىنامدى مويىندايمىن. ادىلدىك بولمايىنشا، ءبىز شەشىمدى ورىندامايمىز", - دەپ ءتۇسىندىردى جانبولات ماماي ءوز ۇستانىمىن.
باۋىرجان بايبەك وكىلىنىڭ وقيعاعا تۇسىنىگى. زاڭگەر ايجان تاشەنوۆا جانبولات مامايدىڭ باۋىرجان بايبەك قايىرىمدىلىق قورىنا بەرگەن 800 000 تەڭگە سوماسىنداعى سوت شىعىندارىن وتەۋ تۋرالى سوت شەشىمىن ورىنداعانىن ايتتى.
"ماماي اشىق تۇردە سوتتارعا سەنبەيتىنىن جانە سوت شەشىمىن ورىندامايتىنىن ايتادى. بۇل ونىڭ قازاقستان رەسپۋبليكاسىنىڭ زاڭناماسىن ساقتامايتىنىن بىلدىرەدى. ول اركەزدە ءارتۇرلى سىلتاۋلار تاۋىپ قاشىپ جۇرەدى. بىراق پروكۋراتۋرا مەن ءتۇرلى مەملەكەتتىك ورگاندارعا شاعىمدانۋ سوت شەشىمىن ورىنداماۋعا نەگىز نەمەسە دالەلدى سەبەپ بولىپ تابىلمايدى. اپەللياتسيالىق شەشىم قابىلدانعاننان كەيىن ماماي تاعى دا توعىزعا جۋىق بەينەروليك شىعاردى جانە وندا مەنىڭ كليەنتىمدى رەنجىتۋدە، جالعان ءارى قاتە دەرەكتەر تاراتۋدا. بۇل تاعى دا ونىڭ دالەلسىز سوت شەشىمىن ورىندامايتىنىن كورسەتەدى. ول ءوز ارناسىندا ميلليونداعان ۇرلىق جونىندە سۇمدىق وتىرىكتى تاراتۋدى جالعاستىرۋدا", - دەدى ول.
سوتتىڭ شەشىمى. سۋديا رابيعا ابلولدانوۆا جەكە سوت ورىنداۋشىلار ينستيتۋتى ءوندىرىسىن توقتاتۋدان باس تارتتى جانە سوت شەشىمىنىڭ ورىندالۋى تۋرالى سوت ورىنداۋشىسىنىڭ ءوتىنىشىن ورىنداماعانى ءۇشىن مەملەكەت كىرىسىنە 140 016 تەڭگە ايىپپۇل ءوندىردى.
