قازىر جوعارعى وقۋ ورنىنا مەملەكەتتىك گراندپەن ءتۇسىپ ستۋدەنت اتانۋ وپ-وڭاي ەكەن. تەك وڭتۇستىكتىڭ وقۋشىسى بولساڭ جەتىپ جاتىر. بۇگىن وسكەمەندە كوشەدە سارسەن امانجولوۆ اتىنداعى شقمۋ-دى ىزدەپ تابا الماي اداسىپ جۇرگەن ءبىر ابيتۋريەنت بالامەن كەزدەسىپ قالدىم. مەملەكەتتىك گراندقا وقۋعا ءتۇسىپ، قۇجاتتارىن تاپسىرۋعا قىزىلوردا جاقتان كەلىپتى. ودان تەستان قانشا بالل جيناپ گراندقا يە بولعانىن سۇرادىم. سويتسەم الگى سابازىم 35 بالل جيناپتى!!!!!
تەستەن 89 بالل جيناسا دا گراندقا وقۋعا تۇسە الماي، اقىلى وقۋعا اقشاسى جوق، تاۋى شاعىلىپ ۇيىندە جىلاپ جاتقان كورشىمنىڭ قىزى ەسىمە ءتۇستى. ەندى ويلاپ قاراسام ونىڭ بار جازىعى شىعىستىڭ ءبىر اۋىلىندا تۋىپ وسكەندىگى ەكەن.
وسكەمەنننىڭ جوعارعى وقۋ ورىندارىندا ءبىلىم الىپ الىپ جاتقان جەرلەستەرىمنىڭ بالالارىن ءجيى كورىپ تۇرامىن. وزدەرى جىلىنا 400-500مىڭ تولەپ اقىلى وقۋ ورىندارىندا وقىپ جاتقانىمەن قويماي ءۇش-تورتتەن بىرىگىپ 50-60 مىڭ تەنگەگە پاتەر جالداپ تۇرادى. ويتكەنى جاتاقحانادا ورىن جوق. ورىنداردى ءبىرىنشى كەزەكتە "سەرپىن" باعدارلاماسى بويىنشا وڭتۇستىكتەن كەلىپ وقىپ جاتقان ستۋدەنتتەرگە عانا بەرىلەدى دەيدى.
ءبىر وتىرىستا د.سەرىكباەۆ اتىنداعى شقمتۋ-دا ساباق بەرەتىن ءبىر وقىتۋشى "سەرپىندىكتەردىڭ" كوپشىلىگىنىڭ وقۋعا نيەتتەرى جوق ەكەندىگىن ايتىپ، رەنىشىن ءبىلدىردى. سويتسە ساباقتان ءجيى قالاتىن ءبىر ستۋدەنتكە سىناق قويماي قويسا كەرەك. سودان الگى ستۋدەنت استاناعا مۇرات ابەنوۆ دەگەن كىسىگە حابارلاپ، رەكتورعا بارىپ شۋلاتىپتى.
سوندا بۇل الالاۋشىلىقتىڭ ارتىندا كىمدەر تۇر؟ اتا-زاڭىمىزدىڭ الدىندا بارلىعىنىڭ قۇقىعىمىز تەڭ ەمەس پە؟ نەلىكتەن بۇكىل مەملەكەت بويىنشا بىردەي باعدارلامامەن ءبىلىم العان ورتا مەكتەپ وقۋشىسىنا وڭتۇستىكتە وقىعانى ءۇشىن سونشاما ارتىقشىلىقتار بەرىلەدى؟ ال سوندا ءبىزدىڭ بالالارىمىز ولاردان ارتىق بالل جيناپ تۇرسا دا اقىلى وقۋعا ءماجبۇر؟ بالاسىن وقىتۋعا اقشاسى جوق وتباسىلار قايتپەك؟
"سەرپىن" بويىنشا شىعىس قازاقستاندا ءبىلىم العان ستۋدەنتتەردىڭ 90 پايىزى ديپلومىن العان سوڭ "جىلى جاقتارىنا" تايىپ تۇرادى ەكەن. ءبىر جىلدارى ولارعا پاتەر بەرمەكشى دە بولىپ جاتقانى ەسىمدە. ال ولاردىڭ كەيىن مەملەكەتتەن العان تەگىن پاتەردى ساتىپ، تاعى دا تايىپ تۇرماسىنا كىم كەپىل؟
ەگەر شىعىستى قازاقيلاندىرعىلارىڭ كەلسە الدىمەن شەكارانىڭ ماڭىنداعى مارقاكول مەن تارباعاتاي اۋداندارىنا اۋدان ورتالىعى رەتىندە قالپىنا كەلتىرىپ، جۇمىس ورىندارىن اشىڭدار. الايدا شىعىستا قازاقتاردىڭ ۇلەس سانى رەسەيگە جىل سايىن كوشىپ جاتقان ورىستاردىڭ ەسەبىنەن ونسىز دا ارتىپ كەلەدى.
"سەرپىنگە" قاراپ قالعان جايىمىز جوق، ەگەر شىنىمەن كومەكتەسكىش بولساڭدار وڭتۇستىكتىك اعايىنداردى وتباسىمەن بىراق كوشىرىپ اكەلىپ، جەرى شۇرايلى شەمونايحا، التاي، ريددەر، گلۋبوكوە دەگەن اۋدانداردان باستارىنا باسپانا بەرىپ، الدارىنا باعۋعا مال سالىپ بەرىڭدەر.
ال ءبىلىم سالاسىن بۇعان ارالاستىرىپ مۇلدە قاجەت ەمەس.
ەرمەك قۇرمانعالي
