Qazir joǵarǵy oqý ornyna memlekettik grandpen túsip stýdent ataný op-ońaı eken. Tek ońtústiktiń oqýshysy bolsań jetip jatyr. Búgin Óskemende kóshede Sársen Amanjolov atyndaǵy ShQMÝ-dy izdep taba almaı adasyp júrgen bir abıtýrıent balamen kezdesip qaldym. Memlekettik grandqa oqýǵa túsip, qujattaryn tapsyrýǵa Qyzylorda jaqtan kelipti. Odan testan qansha ball jınap grandqa ıe bolǵanyn suradym. Sóıtsem álgi sabazym 35 ball jınapty!!!!!
Testen 89 ball jınasa da grandqa oqýǵa túse almaı, aqyly oqýǵa aqshasy joq, taýy shaǵylyp úıinde jylap jatqan kórshimniń qyzy esime tústi. Endi oılap qarasam onyń bar jazyǵy shyǵystyń bir aýylynda týyp óskendigi eken.
Óskemennniń joǵarǵy oqý oryndarynda bilim alyp alyp jatqan jerlesterimniń balalaryn jıi kórip turamyn. Ózderi jylyna 400-500myń tólep aqyly oqý oryndarynda oqyp jatqanymen qoımaı úsh-tórtten birigip 50-60 myń tengege páter jaldap turady. Óıtkeni jataqhanada oryn joq. Oryndardy birinshi kezekte "Serpin" baǵdarlamasy boıynsha ońtústikten kelip oqyp jatqan stýdentterge ǵana beriledi deıdi.
Bir otyrysta D.Serikbaev atyndaǵy ShQMTÝ-da sabaq beretin bir oqytýshy "serpindikterdiń" kópshiliginiń oqýǵa nıetteri joq ekendigin aıtyp, renishin bildirdi. Sóıtse sabaqtan jıi qalatyn bir stýdentke synaq qoımaı qoısa kerek. Sodan álgi stýdent astanaǵa Murat Abenov degen kisige habarlap, rektorǵa baryp shýlatypty.
Sonda bul alalaýshylyqtyń artynda kimder tur? Ata-zańymyzdyń aldynda barlyǵynyń quqyǵymyz teń emes pe? Nelikten búkil memleket boıynsha birdeı baǵdarlamamen bilim alǵan orta mektep oqýshysyna ońtústikte oqyǵany úshin sonshama artyqshylyqtar beriledi? Al sonda bizdiń balalarymyz olardan artyq ball jınap tursa da aqyly oqýǵa májbúr? Balasyn oqytýǵa aqshasy joq otbasylar qaıtpek?
"Serpin" boıynsha Shyǵys Qazaqstanda bilim alǵan stýdentterdiń 90 paıyzy dıplomyn alǵan soń "jyly jaqtaryna" taıyp turady eken. Bir jyldary olarǵa páter bermekshi de bolyp jatqany esimde. Al olardyń keıin memleketten alǵan tegin páterdi satyp, taǵy da taıyp turmasyna kim kepil?
Eger Shyǵysty qazaqılandyrǵylaryń kelse aldymen shekaranyń mańyndaǵy Marqakól men Tarbaǵataı aýdandaryna aýdan ortalyǵy retinde qalpyna keltirip, jumys oryndaryn ashyńdar. Alaıda shyǵysta Qazaqtardyń úles sany Reseıge jyl saıyn kóship jatqan orystardyń esebinen onsyz da artyp keledi.
"Serpinge" qarap qalǵan jaıymyz joq, Eger shynymen kómekteskish bolsańdar ońtústiktik aǵaıyndardy otbasymen biraq kóshirip ákelip, jeri shuraıly Shemonaıha, Altaı, Rıdder, Glýbokoe degen aýdandardan bastaryna baspana berip, aldaryna baǵýǵa mal salyp berińder.
Al bilim salasyn buǵan aralastyryp múlde qajet emes.
Ermek Qurmanǵalı
