استانادا ءوتىپ جاتقان شانحاي ىنتىماقتاستىق ۇيىمىنىڭ (شىۇ) سامميتىنە موڭعوليا پرەزيدەنتى ۋحنااگين حۋرەلسۋح كەلدى، دەپ حابارلايدى “ادىرنا” ۇلتتىق پورتالى قر پرەمەر-ءمينيسترىنىڭ ءباسپاسوز قىزمەتىنە سىلتەپ.
«موڭعوليا پرەزيدەنتى شىۇ سامميتىنە استاناعا ۇشىپ كەلدى. ۋحنااگين حۋرەلسۋحتى ەلوردا اۋەجايىندا قر پرەمەر-ءمينيسترىنىڭ ورىنباسارى عالىمجان قويشىباەۆ كۇتىپ الدى»، - دەلىنگەن سارسەنبى كۇنى تاراتقان حابارلامادا.
موڭعوليا پرەزيدەنتى 3-4 شىلدەدە استانادا وتەتىن شىۇ سامميتىنە قاتىسادى.
«موڭعوليا 2004 جىلى شىۇ-دا باقىلاۋشى مارتەبەسىن العان العاشقى مەملەكەت. سودان كەيىن قاۋىمداستىقتىڭ گەوگرافيالىق كەڭەيۋى ورىن الدى، بۇل شىۇ-نىڭ حالىقارالىق بەدەلىنىڭ ءوسۋىنىڭ دالەلى بولدى»، - دەلىنگەن حابارلامادا.
مينيسترلەر كابينەتىندە اتاپ وتىلگەندەي، قازاقستان-موڭعوليا ىنتىماقتاستىعى اياسىندا ءداستۇرلى دوستىق ساياسي قارىم-قاتىناستاردان باسقا، ساۋدا-ەكونوميكالىق سالاداعى ءوزارا ءىس-قيمىل ەكىجاقتى ىنتىماقتاستىقتىڭ بەرىك نەگىزى بولىپ تابىلادى.
«2023 جىلدىڭ قورىتىندىسى بويىنشا ەكىجاقتى تاۋار اينالىمى 2022 جىلمەن سالىستىرعاندا 27,7%-عا وسكەنىن كورسەتىپ، 133 ملن دوللاردى قۇرادى»، - دەپ ءتۇسىندىردى ۇكىمەت.
