موڭعوليا پرەزيدەنتى ۋحنااگين حۋرەلسۋح بىرىككەن ۇلتتار ۇيىمىنىڭ سەگىزىنشى باس حاتشىسى پان گي مۋنعا موڭعوليانىڭ ەڭ جوعارى مەملەكەتتىك ماراپاتى – «شىڭعىس حان» وردەنىن تابىستادى، دەپ حابارلايدى "ادىرنا" ۇلتتىق پورتالى مونتسامە اگەنتتىگىنە سىلتەمە جاساپ.
بۇل ماراپات موڭعوليا ۇلتتىق ماقتانىش كۇنى رەتىندە اتاپ وتەتىن ۇلى شىڭعىس حاننىڭ تۋعانىنا 862 جىل تولۋىنا وراي بەرىلگەن.
ماراپاتتاۋ راسىمىندە ەل پرەزيدەنتى «شىڭعىس حان» وردەنىمەن حالىق بىرلىگى مەن گۇلدەنۋىن نىعايتۋعا، الەمدىك بەيبىتشىلىك پەن قاۋىپسىزدىكتى قولداۋعا، موڭعوليانىڭ باسقا ەلدەرمەن قارىم-قاتىناسى مەن ىنتىماقتاستىعىن دامىتۋعا، موڭعوليانى حالىقارالىق ارەنادا ىلگەرىلەتۋگە، سونداي-اق ەلىمىزدىڭ الەۋمەتتىك، ەكونوميكالىق جانە رۋحاني دامۋىنا ەلەۋلى ۇلەس قوسقان وتاندىق جانە شەتەلدىك مەملەكەت، قوعام قايراتكەرلەرى مەن ازاماتتار ماراپاتتالاتىنىن اتاپ ءوتتى.
«بۇۇ-نىڭ سەگىزىنشى باس حاتشىسى پان گي مۋن الەم ەلدەرىنىڭ تۇراقتى دامۋ ماقساتتارىن جانە پاريج كەلىسىمىن قابىلداۋىندا جەتەكشى ءرول اتقاردى. سول ارقىلى ول مەملەكەتتەر اراسىندا ورتاق كەلىسىمگە قول جەتكىزۋگە، ادام قۇقىقتارىن، ەركىندىك، ادىلدىك جانە تەڭدىكتى نىعايتۋعا ۇلەس قوستى. موڭعوليا مەن بىرىككەن ۇلتتار ۇيىمى اراسىنداعى ىنتىماقتاستىقتى دامىتۋداعى جانە قورشاعان ورتانى قورعاۋ مەن «جاسىل» دامۋ ساياساتىن ىلگەرىلەتۋدەگى ونىڭ ەڭبەگى ەرەكشە قۇرمەتكە لايىق. وسىعان وراي، موڭعوليا پان گي مۋندى «شىڭعىس حان» وردەنىمەن ماراپاتتاپ، ونىڭ ەڭبەگىن ماڭگى ەستە قالدىراتىنىن ماقتان تۇتادى»، – دەپ اتاپ ءوتتى پرەزيدەنت ۋحنااگين حۋرەلسۋح.
سونىمەن قاتار، پرەزيدەنت موڭعول حالقىن ۇلى شىڭعىس حاننىڭ تۋعانىنا 862 جىل تولۋىمەن شىن جۇرەكتەن قۇتتىقتادى.
«ۇلى شىڭعىس حان – موڭعوليانىڭ تاۋەلسىزدىگى مەن ءومىر ءسۇرۋىنىڭ ايعاعى. ول – ءبىزدىڭ بىرلىگىمىز بەن قۇندىلىقتارىمىزدىڭ سيمۆولى، وتكەنىمىز بەن قازىرگى جانە بولاشاق ۇرپاعىمىزدى بايلانىستىراتىن التىن ارقاۋ، سونداي-اق ءبىزدىڭ رۋحاني كۇشىمىز بەن مەملەكەتتىگىمىزدىڭ جادىنان ءنار الاتىن قاينار كوزى. ۇلى حاننىڭ داڭقى، دانالىعى مەن جەتىستىكتەرى الەمنىڭ دامۋى مەن گۇلدەنۋىندە ەرەكشە ورىن الادى. شىڭعىس حاننىڭ مۇراسى قازىرگى الەمنىڭ قالىپتاسۋىنا تاريحي جانە باعا جەتپەس ۇلەس قوستى. قازىرگى عالىمدار مەن تاريحشىلاردىڭ باعالاۋىنشا، «Pax Mongolica» بەيبىتشىلىك پەن ادامزاتتىڭ تۇراقتى دامۋىن قامتاماسىز ەتۋ ءۇشىن ەلدەردىڭ بىرلەسكەن كۇش-جىگەرىنىڭ نەگىزى بولعان پروگرەسسيۆتى يدەالداردى قامتىعان»، – دەپ اتاپ ءوتتى پرەزيدەنت ۋحنااگين حۋرەلسۋح.
