20 ماۋسىمدا قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى الماس سەيتاقىنوۆ موڭعوليا پرەزيدەنتى ۋحنااگين حۋرەلسۋحقا سەنىم گراموتالارىن تاپسىردى، دەپ حابارلايدى “ادىرنا”.
پرەزيدەنت ۋحنااگين حۋرەلسۋح موڭعوليا مەن قازاقستان اراسىندا 1992 جىلى ديپلوماتيالىق قاتىناستار ورناعان ساتتەن باستاپ "ستراتەگيالىق ارىپتەستىك" دەڭگەيىندە ەكىجاقتى قاتىناستار مەن ىنتىماقتاستىقتىڭ كەڭەيىپ كەلە جاتقانىن اتاپ ءوتتى.
موڭعوليا مەملەكەتىنىڭ باسشىسى قازاقستاننىڭ جاڭا ەلشىسىن ەكى ەل باسشىلارى قول جەتكىزگەن ۋاعدالاستىقتاردى ىسكە اسىرۋعا، ەكى ەل اراسىنداعى تاۋار اينالىمىن ارتتىرۋعا، موڭعوليا مەن قازاقستاندى جالعايتىن ەڭ قىسقا جولدى قۇرۋعا جانە موڭعوليا-قازاقستان ۇكىمەتارالىق كوميسسياسىنىڭ تۇراقتى وتىرىستارىن وتكىزۋگە كۇش سالۋعا شاقىردى.
ءوز كەزەگىندە ەلشى الماس سەيتاقىنوۆ ءوزىنىڭ ديپلوماتيالىق ميسسياسى كەزىندە ەكى ەل اراسىنداعى ستراتەگيالىق ارىپتەستىكتى بارلىق سالالاردا كەڭەيتۋگە جانە ءوزارا ءتيىمدى ەكونوميكالىق ىنتىماقتاستىقتى دامىتۋعا كۇش سالۋعا دايىن ەكەنىن ءبىلدىردى.
