Búgin, 30 maýsym - aqyn, jýrnalıst, el aýzynda júrgen esti án “Nýrıkamal” ániniń sózin jazǵan Hanbıbi Esenqaraqyzy 75 jasqa toldy, dep habarlaıdy “Adyrna” ulttyq portaly.
Hanbıbi Esenqaraqyzy 1949 jyly Saryaǵash aýdanynda dúnıege kelgen. Eńbek jolyn ustazdyq qyzmetten bastady.
1971 – 1976 jyldary Saryaǵash aýdany «Qyzyl tý» gazetiniń qyzmetkeri, 1976 – 1980 jyldary oblystyq teleradıo komıtetinde redaktor, 1980 – 1987 jyldary halyq shyǵarmashylyq oblystyq ortalyǵynda bas maman, 1987 – 1993 jyldary oblystyq «Qaıyrymdylyq» qorynyń tóraıymy, oblystyq «Qazaq tili» qoǵamynyń tóraıymy, oblystyq mádenıet basqarmasynyń bastyǵy qyzmetterin atqardy.
1994 jyldan Sh.Qaldaıaqov atyndaǵy oblystyq fılarmonııanyń dırektory. «Qanat qaqty», «Bultsyz aspan», Juldyzym», «Jangúlim», «Jan aıqaıy», «Mahabbat máńgilik», «Jyr kitaby», «Syr kitaby», «Shyndyqqa qaraı júzdim men»atty prozalyq kitaptardyń avtory. QR eńbek sińirgen qyzmetkeri boldy.
Hanbıbi Esenqaraqyzy áýezdi ánimen de, úılesimdi sózimen de, shyǵý tarıhymen de úlken tanymaldylyqqa ıe bolyp, áli kúnge deıin el aýzynda júrgen “Nýrıkamal” ániniń sózin 1988 jyly jazdy. Al áýeniniń avtory, óziniń jubaıy - Turdyqylysh Iztaev.
Án Turdyqylysh Iztaevtyń Nýrıkamal esimdi qyzǵa ǵashyq bolýynan týǵan eken. Ol kezde otbasynyń úsh balasy bolǵan.
Esenqaraqyzynyń aıtýynsha, ol bir kúni jarynyń pıanıno janynda otyrǵanyn kóredi. Ol kezde ónerpaz jarynyń Nýrıkamal esimdi boıjetkenge ǵashyq bolyp qalǵanyn bilgen. Sol sátte jarynyń atynan Nýrıkamalǵa óleń jazyp, "Aıtqyń kelgeni osy ma edi?" dep, óleńdi kúıeýine ákelip bergen eken.
Sol sátte qazaq ániniń qory "Nýrıkamal" týyndysymen tolyqty.
