قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ استانادا العاش رەت ءباسپاسوز ءماجىلىسىن وتكىزدى، دەپ حابارلايدى "ادىرنا" ۇلتتىق پورتالى Sport24-كە سىلتەپ.
27 ماۋسىم كۇنگى جيىن بارىسىندا باپكەرگە جۋرناليست نۇرسۇلتان قۇرمان قازاقشا سۇراق قويعان بولاتىن. الايدا ستانيسلاۆ چەرچەسوۆكە باق وكىلىنىڭ قويعان ساۋالى ۇناماعان.
باق بەتتەرىندە تاراعان اقپاراتتا نۇرسۇلتان قۇرماننىڭ قازاق تىلىندە جولداعان العاشقى ساۋالدارىن قفف پرەزيدەنتى ادىلەت بارمەنقۇلوۆ ورىسشاعا اۋدارىپ بەرىپ وتىرعان.
«نەگە ورىسشا قويمايسىز؟ مەن قازىر سىزگە ءوز انا تىلىمدە جاۋاپ بەرسەم نە بولادى؟ بىراق ول كەزدە ەشكىم تۇسىنبەيدى. وسىنىڭ الدىندا قازاقشا ساۋالىڭىزدى فەدەراتسيا پرەزيدەنتى اۋدارىپ بەردى، ەندى ول كىسىنى قايتا-قايتا اۋرەلەمەيمىن عوي. ءوتىنىش جاساۋ ءبىرىنشى رەت تەگىن بولادى، ال كەيىننەن ونداي جۇرمەيدى»، – دەدى رەسەيلىك باپكەر ستانيسلاۆ چەرچەسوۆ.
جۋرناليست ءارى بلوگەر نۇرسۇلتان قۇرمان Metaratings باسىلىمىنا قازاق تىلىندەگى سۇراققا بايلانىستى كيكىلجىڭنەن كەيىن فۋتبولدان قازاقستان ۇلتتىق قۇراماسىنىڭ جاڭا باس باپكەرى ستانيسلاۆ چەرچەسوۆتى كەشىرگەنىن ايتتى. قۇرماننىڭ ايتۋىنشا، ستانيسلاۆ چەرچەسوۆ ءوزىن بۇرىنعى ماگومەد اديەۆتەن مۇلدەم باسقاشا ۇستايدى.
«مۇمكىن، چەرچەسوۆ جولدان شارشاعان شىعار، بىراق ول جۋرناليستەرمەن سويلەسۋدىڭ العاشقى مينۋتتارىنان-اق ولارعا قارسى شىقتى. ءبىز مۇنداي مىنەز-قۇلىققا ۇيرەنبەگەنبىز جانە مۇنداي قارىم-قاتىناس ۇنامايدى. سونىمەن، چەرچەسوۆكە، ءبىزدىڭ كومانداعا ساتتىلىك تىلەيمىن!بۇل جولعى جاعدايدى ءازىل رەتىندە قابىلداۋعا بولادى. قاتەلىك جاسامايتىن ادام جوق. مەن ونى بۇل قاتەلىگى ءۇشىن كەشىرەمىن. كەلەسى جولى مۇنداي جاعداي قايتالانسا، ءبىز باسقا شارالاردى قابىلدايمىز»، - دەدى قۇرمان.
ايتا كەتەيىك، جاقىندا باپكەر قازاقستان ۇلتتىق قۇراماسىنىڭ باس باپكەرى ماگومەد اديەۆتى الماستىرعان بولاتىن.
