استانادا وتكەن ماڭىزدى كەزدەسۋدىڭ ناتيجەسى بەلگىلى بولدى، دەپ حابارلايدى "ادىرنا" ۇلتتىق پورتالى.
2026 جىلعى الەم چەمپيوناتىنىڭ ەۋروپا ايماعى بويىنشا ىرىكتەۋ كەزەڭىنىڭ J توبىنداعى 9-تۋر ماتچىندا قازاقستان مەن بەلگيا قۇرامالارى 1:1 ەسەبىمەن تەڭ ءتۇستى.
ويىن استاناداعى «استانا-ارەنا» ستاديونىندا ءوتتى. كەزدەسۋدى ليتۆالىق تورەشى دوناتاس رۋمشاس باستاعان قازىلار القاسى باسقاردى.
كەزدەسۋدىڭ 9-مينۋتىندا داستان ساتباەۆ ءدال سوققىسىمەن قازاقستان قۇراماسىن العا شىعاردى. الايدا ۇزىلىستەن كەيىن بەلگيالىقتار ەسەپتى تەڭەستىرە الدى. 48-مينۋتتا قارسىلاس كوماندانىڭ ويىنشىسى حانس ۆاناكەن گول سوقتى.
79-مينۋتتا ەل قۇراماسىنىڭ ويىنشىسى يسلام چەسنوكوۆ قىزىل قاعاز الدى. قازاقستان قۇراماسى ماتچىنىڭ سوڭىن ون ويىنشىمەن وتكىزۋگە ءماجبۇر بولدى.
بۇل ناتيجەدەن كەيىن بەلگيا قۇراماسى 7 ماتچتان كەيىن 15 ۇپاي جيناپ، J توبىنىڭ كوشىن باستادى. قازاقستان قۇراماسى 8 كەزدەسۋدەن كەيىن 8 ۇپاي جيناپ، تۋرنير كەستەسىندە ءتورتىنشى ورىندا تۇر.
الداعى الەم بىرىنشىلىگىنە 48 قۇراما قاتىسادى. ولار 12 توپقا بولىنەدى. ءار توپتان العاشقى ەكى ورىن يەگەرلەرى، سونداي-اق ءۇشىنشى ورىن العان ۇزدىك سەگىز كوماندا پلەي-وفف كەزەڭىنە جولداما الادى.
بەكارىس جانداۋلەت
