پەرۋدەگى “رەال تيتان” فۋتبول كلۋبىنىڭ 21 جاستاعى ويىنشىسى حەلار گونسالەس التاميرانو الاڭدا العان جاراقاتىنان كەيىن قايتىس بولدى، دەپ حابارلايدى “ادىرنا” ۇلتتىق پورتالى tengrisport-قا سىلتەپ.
وقيعا كۋبوك پەرۋ ماتچىندا “دەفەنسور نۋەۆا” كومانداسىنا قارسى ويىندا ورىن الدى. ويىننىڭ 70-ءشى مينۋتىندا گونسالەس اۋە دوبىن الۋ كەزىندە قارسىلاس كوماندانىڭ قاقپاشىسىمەن سوقتىعىسىپ، اۋىر باس جاراقاتىن الدى. ول ەس-ءتۇسسىز كۇيدە مويوبامبا قالاسىنداعى اۋرۋحاناعا جەتكىزىلگەن. دەگەنمەن، اق حالاتتىلار ونى امان الىپ قالا الماعان. ەكى كۇننەن كەيىن سپورتشى ومىردەن ءوتتى. ءولىمىنىڭ سەبەبى باس مي ارتەرياسىنىڭ جارىلۋى بولعانى انىقتالدى.
“رەال تيتان” كلۋبى الەۋمەتتىك جەلىلەردە گونسالەسكە قۇرمەت كورسەتتى.
ء“بىز سەنى فۋتبولعا جانە وتباسىڭا دەگەن سۇيىسپەنشىلىگىڭ ءۇشىن ءاردايىم ەسكە الامىز. سەن ءبىزدىڭ كوشباسشىمىز بولدىڭ جانە بىزگە ۇلكەن قايعى قالدىردىڭ”، - دەپ جازبا جاريالادى.
حەلاردىڭ اكەسى، حوسە ميگەل گونسالەس فلورەس، ۇلىنىڭ بالا كەزىنەن باستاپ فۋتبولشى بولۋدى ارمانداعانىن ايتىپ، قولداۋ كورسەتكەن بارلىق قاۋىمداستىقتارعا العىسىن ءبىلدىردى.
