قازاقستان ۇلتتىق قۇراماسىنىڭ بۇرىنعى باس باپكەرى ستانيسلاۆ چەرچەسوۆ 2026 جىلعى الەم چەمپيوناتىنىڭ ىرىكتەۋ كەزەڭىندە ۋەلس جانە ليحتەنشتەين قۇرامالارىمەن وتەتىن ماڭىزدى ماتچتار الدىندا فۋتبولشىلارعا قولداۋ ءبىلدىرىپ، قازاقستاندىق جانكۇيەرلەردى ناۋرىز مەرەكەسىمەن قۇتتىقتادى، دەپ حابارلايدى “ادىرنا” ۇلتتىق پورتالى.
“قازاقستان قۇراماسىنا الداعى ىرىكتەۋ ماتچتارىندا ساتتىلىك تىلەيمىن! وتكەن جىلعى تاجىريبەمىز بەن جاڭا جاتتىقتىرۋشىلار شتابىنىڭ كوزقاراسى كومانداعا جاقسى ناتيجە كورسەتۋگە كومەكتەسەدى دەپ سەنەمىن. سونىمەن قاتار، وسى مۇمكىندىكتى پايدالانىپ، بارلىق قازاقستاندىق فۋتبول جانكۇيەرلەرىن ناۋرىز مەرەكەسىمەن جانە كوكتەمنىڭ كەلۋىمەن قۇتتىقتايمىن! بارشاڭىزعا قۋانىش پەن جارقىن ساتتەر تىلەيمىن!” – دەپ جازدى چەرچەسوۆ ءوز الەۋمەتتىك جەلىدەگى پاراقشاسىندا.
قازاقستان ۇلتتىق قۇراماسى 22 ناۋرىزدان 23 ناۋرىزعا قاراعان ءتۇنى، ساعات 00:45-تە كارديففتە ۋەلسپەن كەزدەسەدى. بۇل ويىن 2026 جىلعى الەم چەمپيوناتىنا ىرىكتەۋ كەزەڭىندەگى ماڭىزدى ماتچتاردىڭ ءبىرى بولماق.
ەسكە سالايىق، ستانيسلاۆ چەرچەسوۆ 2024 جىلدىڭ شىلدە ايىندا قازاقستان قۇراماسىنىڭ باس باپكەرى قىزمەتىنە تاعايىندالعان بولاتىن. الايدا ول جۋرناليستەردىڭ قازاق تىلىندە قويعان سۇراعىنا جاۋاپ بەرە الماي، “سەن فرانتسۋزشا سويلەپ تۇرسىڭ با؟” دەپ ازىلدەگەن ەدى. وسى ارەكەتى ءۇشىن قازاقستان فۋتبول فەدەراتسياسى وعان مەملەكەتتىك ءتىلدىڭ ماڭىزىن ءتۇسىندىرىپ، 200 اەك (738 400 تەڭگە) كولەمىندە ايىپپۇل سالعان.
چەرچەسوۆ قازاق ءتىلىن ۇيرەنۋى ەكىتالاي ەكەنىن ايتقانىمەن، قاجەت سوزدەردى بىلەتىنىن اتاپ وتكەن.
