تانىمال ازىلكەش، اكتەر تۇرسىنبەك قاباتوۆ ۇشاقتا ماس كۇيىندە بەيادەپ ءسوز ايتقانى ءۇشىن جازاعا تارتىلدى. بۇل تۋرالى جوعارى سوت مالىمدەدى، دەپ حابارلايدى “ادىرنا” ۇلتتىق پورتالى.
مالىمەتكە سايكەس، ازىلكەشكە ۇساق بۇزاقىلىق جاسادى دەگەن ايىپ تاعىلدى.
"استانا قالالىق اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى ۇساق بۇزاقىلىق جاساعانى ءۇشىن ايىپتالعان ادامعا قاتىستى ءىستى قارادى (اقبتك-ءنىڭ 434-بابىنىڭ 1-بولىگى). ءىس ماتەريالدارىنا سايكەس، ايىپتالۋشى ۇشاق بورتىندا ماس كۇيىندە ادەپسىز سوزدەر ايتقان", – دەلىنگەن حابارلامادا.
سوتتا ول بوردسەرىكتىڭ ناشار قىزمەتىنە كوڭىلى تولمايتىنىن ايتىپ، ولارعا ءوز ەسكەرتۋىن بىلدىرگەن. ول ءوزىنىڭ ادەپسىز ءسوز ايتقانى نەمەسە ايتپاعانى ەسىندە جوق ەكەنىن العا تارتقان، بىراق قوعامدىق ءتارتىپتى بۇزعانى ءۇشىن كەشىرىم سۇراعان.
كۋا (اعا بوردسەرىك) قۇقىق بۇزۋشىنىڭ ۇشاق بورتىندا ماس كۇيىندە بولعانىن جانە ادەپسىز سوزدەر ايتىپ، سول ارقىلى قوعامدىق ءتارتىپ پەن ازاماتتاردىڭ تىنىشتىعىن بۇزعانىن راستاعان.
قۇقىق بۇزۋشىنىڭ كىناسى كۋانىڭ ايعاقتارىمەن، جولاۋشىنى پوليتسياعا بەرۋ اكتىسىمەن، بەينەجازبامەن جانە مەديتسينالىق ساراپتاما قورىتىندىسىمەن راستالادى.
اقبتك-ءنىڭ 434-بابىنىڭ 1-بولىگىنىڭ سانكتسياسىندا 20 اەك كولەمىندە ايىپپۇل سالۋ نەمەسە 5-تەن 15 تاۋلىككە دەيىن اكىمشىلىك قاماققا الۋ كوزدەلگەن. سوت جاسالعان ءىس-ارەكەتتىڭ كولەمى مەن سيپاتىن، قوعامعا تەرىس اسەر ەتەتىن جانە قوعامدى سىيلاماۋشىلىقتى كورسەتۋگە باعىتتالعان، لايىقسىز مىنەز-قۇلىقپەن كورىنەتىن قۇقىققا قارسى مىنەز-قۇلىقتىڭ جالعاسۋىن ەسكەرە وتىرىپ جازا تاعايىندادى.
ازىلكەش بەس تاۋلىككە اكىمشىلىك قاماۋعا الىندى. سوت ۇيعارىمى زاڭدى كۇشىنە ەنگەن جوق جانە وعان شاعىم جاساۋعا بولادى.
