استانادا اسكەري قىزمەتتەن قاشقانى ءۇشىن ايىپتالعان رەسەي فەدەرالدىق قاۋىپسىزدىك قىزمەتىنىڭ (فسو) بۇرىنعى قىزمەتكەرى ميحايل جيلين قاماۋعا الىندى، دەپ حابارلايدى “ادىرنا” ۇلتتىق پورتالى كازتاگ-قا سىلتەمە جاساپ.
«2022 جىلعى 12 جەلتوقساندا استانا قالاسىنىڭ مامانداندىرىلعان اۋدانارالىق تەرگەۋ سوتى ەسىل اۋدانى پروكۋراتۋراسىنىڭ ۇسىنىسى بويىنشا رەسەي ازاماتى م. جيلينگە قاتىستى ونى 40 تاۋلىككە ۋاقىتشا قاماۋعا الۋ تۋرالى شەشىم قابىلدادى»، - دەپ حابارلادى ەلوردالىق سوتتىڭ ءباسپاسوز قىزمەتى.
بۇعان دەيىن «نەگە» پورتالى ءجيليننىڭ قازاقستاننان بوسقىن مارتەبەسىن العىسى كەلەتىنىن جازعان بولاتىن.
«ول مەملەكەتتىك شەكارانى زاڭسىز كەسىپ ءوتتى (رف قىلمىستىق كودەكسىنىڭ 322-بابى، ەكى جىلعا دەيىن باس بوستاندىعىنان ايىرۋ) جانە اسكەري جاۋاپتى قىزمەت ورنىن ءوز ەركىمەن تاستاپ كەتكەنى ءۇشىن (رف قىلمىستىق كودەكسىنىڭ 338-بابى، 15 جىلعا دەيىن) دەپ ايىپتالۋدا. قاشقىن فسو-دا 18 جىل قىزمەت ەتتى. نوۆوسيبيرسك قالاسىنداعى فسو ارنايى بايلانىس جانە اقپارات ورتالىعىنىڭ ينجەنەرى بولعان. ول ۇكىمەتتىك بايلانىستاردى قامتاماسىز ەتۋمەن اينالىسقان، بۇل ونىڭ مەملەكەتتىك قۇپيالارعا قاتىسى بار ەكەنىن بىلدىرەدى»، - دەلىنگەن حابارلامادا.
فسو مەملەكەتتىك قاۋىپسىزدىكتى قامتاماسىز ەتۋ، مەملەكەتتىك ورگانداردىڭ قاجەتتىلىكتەرى ءۇشىن بايلانىس سالاسىنداعى مەملەكەتتىك ساياساتتى، قۇقىقتىق رەتتەۋدى، باقىلاۋدى جانە قاداعالاۋدى ازىرلەۋ جانە ىسكە اسىرۋ فۋنكتسيالارىن، سونداي-اق مەملەكەتتىك ورگانداردىڭ قىزمەتىن اقپاراتتىق تەحنولوگيالار مەن اقپاراتتىق-تالداۋدى قامتاماسىز ەتۋ فۋنكتسيالارىن ورىندايدى.
